“Vera Andrron Detin” triumfon në Göteborg Film Festival

Filmi “Vera Andrron Detin” me regji të Kaltrina Krasniqit ka fituar çmim në Festivalin e Filmit Göteborg.

Filmi që mbështetet në skenarin e Doruntina Bashës fitoi çmimin për Debutimin Ndërkombëtar në ‘Ingmar Bergmab Competition’.

Juria e ka vlerësuar filmin kosovar si një film tëjet motivues në thyerjen e barrierave patriarkale.

“Ne zhytemi në një tipar debutues të ndërtuar me mjeshtëri, ku çdo skenë na çon më thellë në betejat e heroinës sonë magjepsëse ndërsa ajo i shtyn kufijtë e traditave të çimentuara patriarkale. Nëpërmjet një ndërveprimi të sofistikuar mes anëtarëve të familjes, ky regjisor arrin një portret emocionues të një shoqërie mbytëse dhe guximin që duhet për t’u dëgjuar” thuhet në vlerësimin e jurisë.

Filmi shfaq Verën, një përkthyese e gjuhës së shenjave, e cila bën një jetë të strukturuar mirë: një grua e martuar me një gjykatës të njohur, një nënë mbështetëse dhe një gjyshe të kujdesshme. 

Qetësia e saj prishet nga vetëvrasja e të shoqit e ndjekur nga një paradë e padëshiruar kërcënuese e burrave që pretendojnë se kanë pronësi mbi shtëpinë e familjes së tyre. 

Kur shtyllat e një skeme të botës së krimit fillojnë të dalin në sipërfaqe, bota e Verës do të përballet me rrezikun dhe gati do të shembet. 

Frika dhe mosbesimi do ta detyrojnë Verën të marrë në duart e saj fatin e familjes./Indeksonline/