Veseli: FSK-ja shkon në veri sa herë është e nevojshme, kjo vlerësohet nga NATO-ja
Ish-gjenerali i Forcës së Sigurisë së Kosovës, Afrim Veseli e konsideron të rëndomtë operacionin e sotëm të kërkim-shpëtimit në Liqenin e Ujmanit. Ai thotë se nuk është hera e parë që njësitet e specializuara të FSK-së intervenojnë në veri të vendit derisa përmend disa raste të tilla gjatë kohës sa ai ishte ushtarak.
Njësitë e specializuara për kërkim-shpëtim të Forcës së Sigurisë së Kosovës po zhvillojnë operacion për gjetjen e një personi që dyshohet të jetë mbytur të dielën, më 27 korrik, në Liqenin e Ujmanit. Bëhet fjalë për një 33-vjeçar që u raportua se kërceu nga ura.
“Lexova dhe dëgjova shumë sot, një bujë shumë e madhe për një operacion të rëndomtë. Nuk është hera e parë që Forca e Sigurisë së Kosovës intervenon në veri të vendit. Kemi pasur operacione të tilla edhe në të kaluarën që nga viti 2015, kemi pasur një rast të tillë në kërkim shpëtim, pastaj në ujëra kemi pasur edhe çështje të deminimit. Forca e Sigurisë së Kosovës i ka kapacitetet ndoshta më të mira në Ballkan në fushën e kërkim-shpëtimit urban, kërkim-shpëtimit malor dhe kërkim-shpëtimit në ujëra. Këto kapacitete që i kemi ngritur ndër vite është një angazhim shumë i madh i Forcës së Sigurisë së Kosovës, por paraprakisht është një ndihmesë e madhe e aleatëve tanë, të cilët na kanë ndihmuar që t’i ngritim”, thotë Veseli.
Kërkimi për 33-vjeçarin që u raportua se kërceu nga ura, deri më tash është zhvilluar vetëm nga Policia e Kosovës dhe Shoqata e Kosovës për Kërkim dhe Shpëtim. FSK-ja iu bashkua ekipeve në ditën e tretë të kërkimeve. Kjo u bë vetëm pas një bashkërendimi me misionin e NATO-s në Kosovë, KFOR.
Dislokimi i trupave të FSK-së në veriun e banuar me shumicë serbe mund të bëhet vetëm me pëlqim paraprak të KFOR-it, në bazë të një zotimi që është bërë në vitin 2013 nga Qeveria e Kosovës dhe NATO.
Ish-gjenerari i Forcës së Sigurisë së Kosovës thotë se dislokimi i trupave të FSK-së në pjesën veriore të vendit mund të ndodhë sa herë që ka nevojë.
“Para një kohe u bë bërë problem ajo letra e zotimeve, tash unë i kisha pyetur ata politikanë që dëshironin të ngrisnin padi edhe ndaj presidentit Thaçi. A po e sheh që nuk është ashtu? A po e sheh që FSK mund të shkojë atje? Është një koordinim, subkoordinim mes Forcës së Sigurisë së Kosovës dhe NATO-s. Kur fola për kapacitetet, FSK i ka këto kapacitete që KFOR nuk i ka, për atë ka shkuar FSK, ka qenë e domosdoshme. FSK shkon në veri aq herë sa ka nevojë, qoftë për operacione humanitare, qoftë për mbrojtje të territorit, por këtë e vlerëson NATO”, shprehet ai për KosovaPress.
Pas mbërritjes së trupave të FSK-së në liqenin e Ujmanit, Lëvizja Vetëvendosje ka shkruar “FSK për herë të parë si ushtri në veri të vendit”.
Kjo po kritikohet nga ish-gjenerali i FSK-së, Afrim Veseli, i cili thotë se “politika duhet t’i mbajë duart larg nga organet e sigurisë”.
“Politika duhet t’i mbajë duart larg nga organet e sigurisë, në këtë rast nga ushtria. Nuk mund të marrë askush kredita në një operacion të rëndomtë. Krejt falënderimi duhet të ju shkojë atyre djemve që realizojnë operacionin. Shpresoj dhe besoj në ta që do të jetë i suksesshëm, fatkeqësisht i suksesshëm meqë është natyra e operacionit e tillë. Unë do të kisha bërë apel që në vend të këtij pompoziteti për kreditë politike, të mendojmë më shumë për Forcën e Sigurisë se si e ka situatën sot personeli i saj”, përfundon ai.
Ministri në detyrë i Mbrojtjes, Ejup Maqedonci tha më herët se pjesëtarët e FSK-së janë angazhuar në mbështetje të autoriteteve civile në këtë rast.
“Forca e Sigurisë së Kosovës në kuadër të detyrave të saj thelbësore ka edhe mbështetjen e autoriteteve civile. Në këtë aspekt në bashkëpunim me Agjencinë e Menaxhimit të Emergjencave, Policinë e Kosovës dhe bashkërendim me KFOR, ekipet e specializuara të FSK kanë filluar operacionin e kërkimit në liqenin e Ujmanit me synimin që sa më shpejtë të nxirret trupi i mërgimtarit dhe ti lehtësohet dhimbja familjes’, shkroi Maqedonci në Facebook.
Forca e Sigurisë së Kosovës është në fazën e transformimin në ushtri, proces ky që pritet të përfundojë deri në vitin 2028./Indeksonline/
