Veseli ka disa fjalë për protestën e VV-së dhe vizitën e Thaçit në veri
Kryeparlamentari Kadri Veseli ka komentuar protestën e sotme të Vetëvendosjes, të mbajtur në kryeqytet kundër presidentit Hashim Thaçi si dhe vizitën e këtij të fundit në veri.
Në një postim në Facebook, Veseli ka shkruar se duhet të marr fund politika e mbrapshtë me demonstrime të rrejshme patriotike, transmeton Indeksonline.
Sipas tij, ka një mënyrë për të mbrojtur sovranitetin, duke qëndruar të bashkuar para Serbisë.
Më poshtë postimi i Veselit:
Sot nuk fitoi asgjë Kosova. Sot humbën qytetarët e saj, u lëndua besimi i tyre në shtetin e Kosovës. Sot fituan inatet kundër njëri tjetrit dhe manipuluesit politikë.
Një gjë duhet ta ketë të qartë secili: Kosova, sovraniteti i saj, integriteti i saj territorial, kufijtë e saj, veriu i saj, nuk mbrohen me demonstrime të rrejshme patriotike kundër njeri tjetrit.
Duhet të marrë fund kjo politikë e mbrapshtë, që prodhon situata manipuluese dhe të rrezikshme për vendin, të tilla si të ditës së sotme.
Ka vetëm një mënyrë për të mbrojtur dinjitetin e qytetarëve dhe vetë shtetin e Kosovës: duke qëndruar të bashkuar përballë Serbisë. Rrugët tjera e kanë një emërues të përbashkët: dështimin dhe dëmtimin e shtetit. Pa asnjë dilemë! /Indeksonline/