Veseli për ftesat e Speciales për ish-drejtuesit e UÇK-së: Do të kthehen të pafajshëm e kryelartë!

Kryetari i Kuvendit të Republikës së Kosovës, Kadri Veseli, përmes një shkrimi të bërë në faqen e tij zyrtare Facebook ka reaguar në lidhje me ftesat e fundit të Gjykatës Speciale në adresë ish-drejtuesve të UÇK-së.

Veseli ka thënë se ka pranuar me keqardhje lajmin e thirrjes nga Specialja për Jakup Krasniqit, teksa këtë e quajti goditje për bashkëluftëtarët e tij, derisa tha se këtë sfidë do ta kalojnë së bashku duke dalur edhe më të fortë, përcjellë Indeksonline.

Ky është postimi i tij i plotë:

Lufta e popullit shqiptar për të jetuar i lirë dhe i pavarur me dinjitet e krenari kombëtare në trojet e veta shekullore të Kosovës, është një ndër kapitujt më të ndritur të historisë sonë bashkohore dhe askush nuk do mund ta njollosi dot. Me keqardhje pranova sot lajmin e thirrjes nga gjykata speciale të ish-Zëdhënësit të Ushtrisë Çlirimtare të Kosovës, z. Jakup Krasniqi menjëherë pasi janë thirrur tashmë ish- shefi i Shtabit të UÇK-së, Bislim Zyrapi, ish- komandanti i Zonës Operative të Dukagjinit, Ramush Haradinaj dhe ish- anëtari i Shtabit të UÇK-së, Sokol Bashota. Kjo është një goditje për bashkëluftëtarët e mi, për UÇK-në dhe luftën tonë, por unë jam i sigurtë që do e kapërcejmë me kurajo dhe nder këtë sfidë së bashku dhe do dalim prej saj më të fortë se më parë. Unë jam i bindur se ata do të kthehen përsëri të pafajshëm e kryelartë sepse e drejta ka qenë dhe mbetet në anën tonë dhe ne kemi qenë në anën e duhur të historisë.