Viktima që u dhunua për 6 muaj çdo ditë nga serbët tregon si e ndaloi bashkëshorti nga vetëvrasja

Aplikimi për njohjen e statusit të viktimave të dhunës seksuale gjatë luftës ka filluar që nga data dy shkurt e këtij viti.

Deri më tani kanë aplikuar mbi 780 raste. Prej tyre njohjen e statusit nga ana e Komisionit Qeveritarë e kanë marrë 145 raste dhe 102 raste janë refuzuar.

Viktima me shifrën 24 është dhunuar për 6 muaj me radhë çdo ditë nga grupe të policëve e ushtarëve serbë të cilët pikat e tyre i kishin në Skenderaj në vitin 1998.

Ajo thotë se ka tentuar që disa herë t`i japë fund jetës së saj por bashkëshorti e ka mbështetur që ajo të kërkojë ndihmë mjekësore dhe të rehabilitohet.

Ajo thotë se pavarësisht faktit që ka deponuar fakte në UNMIK, EULEX dhe Prokurori, Komisioni Qeveritarë që shtatë muaj nuk i ka kthyer përgjigje për statusin e saj.

Por, kryetarja e këtij Komisioni Minire Begaj-Balaj thotë se kësaj viktime i është njohtë statusi dhe ajo i ka marrë tri pensione në mënyrë retroaktive.