Vitomerica e Pejës cak i hajnave, flet një banor: S’po mund të jetojmë shlirë!
Vjedhjet janë bërë dukuri shqetësuese në vendin tonë. Brenda ditës raportohen dhjetëra raste në polici, derisa rrallë herë kapen kryerësit e këtyre veprave.
Banorët e fshatit Vitomericë të Pejës, s’po gjejnë qetësi, nga hajdutët, të cilët janë në hall dhe mjaft të shqetësuar.
Mehmet Bajraj, një banor i fshatit, ka treguar për IndeksOnlinen, se mbrëmë një market është grabitur.
Ai thotë se ndihen të pambrojtur, ani pse policia është lajmëruar, por që hajdutët s’kanë të ndalur.
“Mbrëmë në orën 3 të mëngjesit, është plaçkitur një market, ndërsa këto ditë po ashtu hajnat kanë hyrë edhe në një kioskë, kjo është hera e tretë që hajnat vjedhin në kioskë.
Këto vjedhje kanë nisur me vite, por kohët e fundit çdo natë ka vjedhje. Edhe vitin e kaluar në të njëjtën kohë më është plaçkitur shtëpia”, ka thënë Bajraj.
Ai ka treguar se policia ka edhe videot e vjedhjes së marketit.
“Ne s’mund të punojmë e të jetojmë shlirë në këtë vend, besoni kemi marrë trauma ku çdo natë ka vjedhje”, shprehet ai.
IndeksOnline pak ditë më parë ka raportuar edhe për shqetësimet e banorëve të fshatit Miradi e Poshtme të Fushë-Kosovës, të cilët deklaruan po ashtu që çdo natë s’po flenë të qetë për shkak të hajnave.
