Vrasja e 24 vjeçarit në Ferizaj/ Prokuroria ngrit aktakuzë kundër pesë personave

Prokuroria Themelore në Ferizaj, Departamenti për krime të rënda, njofton opinion publik se ka ngritur aktakuzë kundër pesë (5) personave të pandehur me inicialet L.M, A.B.,E.B., R.J., dhe M.A.

Sipas aktakuzës, i pandehuri L.M., më 04 shtator 2020, në Ferizaj, me dashje ka privuar nga jeta tani të ndjerin B.Q. dhe me atë rast ka vënë në rrezik edhe jetën e të dëmtuarit A.L., me ç’rast ka kryer veprën penale: “Vrasje e rëndë” nga neni 173 paragrafi 1, nënparagrafi 1.5 të Kodit penal të Republikës së Kosovës (KPRK).

Ndërsa, të pandehurit A.B. dhe E.B., kanë marrë pjesë në rrahjen, e cila ka rezultuar me vdekjen e tani të ndjerit B.Q., duke e goditur me grushta në pjesë të ndryshme të trupit me të cilën në bashkëkryerje kanë kryer veprën penale: “Pjesëmarrje në rrahje nga neni 187 paragrafi 1 lidhur me nenin 31 të KPRK-së.

Kurse, i pandehuri R.J., me datë, kohë dhe vend të njëjtë, ka kanosur seriozisht me fjalë të dëmtuarin A.L., me të cilën ka kryer veprën penale: “Kanosje” nga neni 181 paragrafi 1 të KPRK-së. Po ashtu, ai me gjithë faktin se ka qenë në dijeni për identitetin e kryerësit të veprës penale dhe për veprën penale, një fakt të tillë nuk e ka lajmëruar tek organet kompetente, me të cilën ka kryer veprën penale: “Moslajmërimi i veprave penale apo kryerësve të tyre” nga neni 378 paragrafi 1 nën paragrafi 1.1 të KPRK-së.

Ndërsa, i pandehuri M.A., me dashje ka ndihmuar të pandehurit L.M., A.B., E.B., në shmangien e zbulimit dhe mosarrestimit nga organet e ndjekjes, me ç’rast ka kryer veprën penale: “Dhënia e ndihmës kryesve pas kryerjes së veprave penale, nga neni 380 paragrafi 2, nënparagrafi 2.1 lidhur me paragrafin 1 të KPRK-së.

Prokurori i çështjes me rastin e ngritjes së aktakuzës, i ka propozuar gjykatës që të pandehurit të shpallen fajtorë dhe të dënohen sipas ligjit, për veprat penale të cilat u vihen në barrë.