Xavi Simons zyrtarizohet te skuadra angleze

Tottenham Hotspur ka zyrtarizuar transferimin e mesfushorit holandez Xavi Simons nga RB Leipzig.

Londinezët kanë paguar rreth 60 milionë euro për 22-vjeçarin, i cili ka nënshkruar kontratë pesëvjeçare me klubin anglez, shkruan IndeksOnline.

Simons, i cili sezonin e kaluar shkëlqeu në Bundesliga me 22 gola dhe 24 asistime, ka zgjedhur të mbajë fanellën me numrin 7, që mbeti bosh pas largimit të Heung-Min Son.

Chelsea ishte gjithashtu në garë për shërbimet e tij, por Tottenham arriti të mbyllë marrëveshjen me sukses. Trajneri Thomas Frank e cilësoi transferimin si “një hap gjigant për fuqizimin e mesfushës dhe sulmit të ekipit”.

Me këtë lëvizje, Tottenham synon të forcojë repartin ofensiv, sidomos pas mungesës së gjatë të James Maddison për shkak të lëndimit./IndeksOnline/