Yamal blen shtëpinë e Shakirës dhe Piques

Lamine Yamal vazhdon të bëjë përparim të qëndrueshëm si në fushë ashtu edhe jashtë saj. Ylli 18-vjeçar i FC Barcelona është gati të finalizojë blerjen e një prej pronave më ikonike në botën e argëtimit dhe sportit, rezidencës ku Gerard Piqué dhe Shakira jetuan së bashku gjatë lidhjes së tyre.

Kompleksi, me vlerë 14 milionë euro, përfshin tri shtëpi të ndërtuara në një truall prej 3,800 metrash katrorë, me një pishinë të brendshme dhe të jashtme, një palestër dhe shumë gjëra luksoze.

Lojtari do të ketë palestrën e tij, një trajner fitnesi, një fizioterapist, zona për të pritur miq dhe një sistem sigurie të përforcuar. Rezidenca u projektua në vitin 2012 nga arkitektja Mireia Admetller, me qëllim që të bëhej një strehë për Shakirën, Piqué-n, fëmijët e tyre dhe prindërit e tyre. 

Vite më vonë, ajo po bëhet shtëpia e re e njërit prej lojtarëve më premtues në futbollin botëror./Indeksonline/