Zgjaten kufizimet kundër Covid edhe në Itali, ambasada e Kosovës del me njoftim
Ambasada e Kosovës në Itali ka njoftuar shtetasit e Kosovës që për hyrjen dhe kthimin në Itali parashikohet izolimi i detyrueshëm 14-ditor.
Ambasada ka njoftuar po ashtu se masat antiCovid të Qeverisë italiane do të mbesin në fuqi deri më 5 mars 2021.
“Udhëtimet Itali-Kosovë dhe anasjelltas: lejohen vetëm në raste urgjente të dëshmuara, dhe për hyrjen-kthimin në Itali, parashikohet vetizolimi i detyrueshëm 14-ditor, si edhe mbikëqyrja shëndetësore. Sipas këtij dekreti, këto masa mbesin në fuqi nga 16 janari deri më 05 mars 2021”, thuhet ndër të tjera.
Të nderuar bashkatdhetarë,
Ambasada e Republikës së Kosovës në Itali u bën thirrje të gjithë shtetasve kosovarë me banim -qëndrim në Itali të respektojnë masat dhe protokollet parandaluese antiCovid-19, të përcaktuara në dekretin e fundit të Qeverisë italiane, i përditësuar më 14 janar 2021, i cili parashikon zgjatjen e gjendjes emergjente me kufizimet e lëvizjes si në vijim:
– Deri më 15 shkurt 2021, parashikohen kushtëzime për qarkullimin dhe lëvizjen brenda territorit italian: çdo lëvizje mes komunave (përjashtohen ato me më pak se 5000 banorë), prefekturave dhe rajoneve është e ndaluar; lejohen lëvizjet vetëm për arsye pune, shëndetësore, kthim në vendbanim dhe nevoja urgjente, ku parashikohet gjithsesi formulari i vetëdeklaratës ku dëshmohet arsyeja e lëvizjes;
– Udhëtimet Itali-Kosovë dhe anasjelltas: lejohen vetëm në raste urgjente të dëshmuara dhe për hyrjen-kthimin në Itali, parashikohet vetizolimi i detyrueshëm 14 ditor, si edhe mbikëqyrja shëndetësore. Sipas këtij dekreti, këto masa mbesin në fuqi nga 16 janari deri më 05 mars 2021.
– Kalimi transit nëpër Itali: të gjithë shtetasit kosovarë që udhëtojnë nga shtetet e BE-së mund të kalojnë transit përmes rrugëve tokësore, duke plotësuar formularin e vetëdeklarimit, ku shpjegohet qartë qëndrimi në 14 ditët e fundit, duke respektuar detyrimin që të lëshojnë territorin italian brenda 36 orëve.
Lejet e qëndrimit-“permessi di soggiorno” të gjithë shtetasit kosovarë të cilëve u ka skaduar leja e qëndrimit italiane, DPCM Nr.2 i 14.01.2021, neni 5, parashikon zgjatjen e vlefshmërisë së tyre deri më 30 prill 2021.
Ju informojmë gjithashtu se gjatë kësaj periudhe, Ambasada e Republikës së Kosovës në Itali ofron shërbime konsullore vetëm me termine-takime të rezervuara paraprakisht.
Për çdo kërkesë me natyrë urgjente, lutemi kontaktoni në:
– Nr. e tel: 06/85356571, nga e hëna deri të enjten nga ora 09 – 17;
– Nr. emergjent: +39327452991;
– E-mail: consulate.rome@rks-gov.net; embassy.italy@rks-gov.net;
– FB: @Ambasada e Republikës së Kosovës në Itali
Ju ftojmë të kontrolloni vazhdimisht webfaqen zyrtare dhe profilin tonë zyrtar në facebook për t’u informuar mbi përditësimet e reja lidhur me rregullat e qarkullimit.
Vetëm në këtë mënyrë, duke respektuar me rigorozitet masat parandaluese, ne mbrojmë shëndetin tonë dhe atë të afërmeve tanë.
Ju falënderojmë për mirëkuptimin dhe bashkëpunimin!