Zgjedhjet në Podujevë e Mitrovicë të Veriut, Osmani diskuton me kryetaren e KQZ-së

Me qëllim të bashkërendimit për zgjedhjet në Podujevë dhe në Mitrovicë të Veriut, u.d. e presidentes Vjosa Osmani-Sadriu ka mbajtur një takim virtual me Valdete Dakan, kryetare e KQZ-së.

U.d. e presidentes ofroi përkrahjen e saj të plotë, në mënyrë që zgjedhjet në këto dy komuna të organizohen duke mbrojtur shëndetin e qytetarëve si dhe të drejtën e tyre kushtetuese për të zgjedhur dhe për t’u zgjedhur.

Ndërkaq Daka e njoftoi Osmanin se janë bërë të gjitha përgatitjet e nevojshme, si për zbatimin e Manualit për mbrojtje nga pandemia, ashtu edhe për zgjedhje të drejta në përputhje të plotë me praktikat demokratike. Ajo e siguroi u.d. së presidentes se deri tani nuk kanë hasur në asnjë problem dhe se janë në koordinim të plotë me institucionet përgjegjëse  që të jenë të pajisur me të gjitha materialet e nevojshme.

Në këtë kontekst,Osmani bëri thirrje që si personeli zgjedhor, ashtu edhe të gjithë qytetarët, t’i respektojnë masat për mbrojtje nga pandemia, duke mbajtur higjienën, maskën dhe distancën. Ajo ritheksoi rëndësinë e realizimit të së drejtës kushtetuese për të votuar për qytetarët e këtyre dy komunave.