Zjarr në një klub nate në Turqi, numri i të vdekurve shkon në 29

Ka shkuar në 29 numri i personave të vdekur nga një zjarr, i cili ka filluar gjatë punimeve të restaurimit në një klub nate në Stamboll të Turqisë.

Bëhet e ditur se përveç të vdekurve, tetë persona të tjerë janë plagosur, ku shtatë prej tyre janë në gjendje të rëndë.

Zyra e guvernatorit tha se zjarri filloi në lagjen Beshiktash, në qendër të Stambollit në anën evropiane të qytetit dhe se të gjithë viktimat ishin punëtorë ndërtimi, shkruan CNN.

Ministri turk i Drejtësisë, Yilmaz Tunc bëri të ditur se policia turke ka lëshuar urdhër-arrest për pesë persona, duke përfshirë tre menaxherë të klubit.

“Inspektimi i vendit dhe përpjekjet për mbledhjen e provave janë duke vazhduar, dhe një ekip prej 3 ekspertësh të specializuar në sigurinë në punë dhe zjarrin po vazhdojnë gjithashtu punën e tyre për të përcaktuar shkakun e zjarrit”, tha ai.