Zogaj, Muratit: Burokracia qendrore që po e mban peng zhvillimin e Prishtinës

Deputeti i LDK-së, Alban Zogaj i është përgjigjur ministrit në detyrë Hekuran Murati për deklaratën e tij për “paratë e tepruara të Prishtinës”.

Zogaj ka thënë se në financat publike nuk ekziston koncepti i “parave të tepruara”, kur ato janë të ndara për projekte konkrete.

“Deklaratat e ministrit të Financave për “paratë që i kanë tepruar Prishtinës ndër vite” janë mashtruese dhe të pavërteta.
Në financat publike nuk ekziston koncepti i “parave të tepruara”, kur ato janë të ndara për projekte konkrete. Çdo euro në buxhetin e Komunës se Prishtinës është e planifikuar sipas projekteve, kontratave, procedurave dhe fazave të zbatimit.
Nëse një projekt nuk ekzekutohet brenda vitit, mjetet barten me vendim të Ministrisë së Financave në vitin pasues, praktikë e rregullt ligjore dhe e domosdoshme për projekte shumëvjeçare si rrugët, ndriçimi publik, apo parqet.
Në të vërtetë, pikërisht Ministria e Financave ka vonuar bartjen e këtyre mjeteve, duke penguar përparimin e projekteve në kohë. Nuk është komuna ajo që “i lë paratë pa i shpenzuar”, por burokracia qendrore që po mban peng zhvillimin e Prishtinës për motive politike.
Në vend se të manipulojë opinionin, ministri duhet të sqarojë pse ka bllokuar buxhetin dhe bartjen e fondeve të Prishtinës”, shkruan Alban Zogaj në reagim./Indeksonline/