22:21 / E Enjte, 23 Qershor 2022 / MSH

​ShBA, 450 milionë dollarë ndihmë ushtarake për Ukrainën

Shtetet e Bashkuara do të dërgojnë 450 milionë dollarë të tjera ndihmë ushtarake në Ukrainë, e cila përfshin sisteme shtesë raketore me rreze të mesme veprimi, thanë sot zyrtarët amerikanë në kushte anonime.

Paketa e fundit e ndihmës do të përfshijë një numër të madh sistemesh raketash artilerie me lëvizshmëri të lartë ose HIMARS.

Katër pakot e para të ndihmave të dërguara nga Shtetet e Bashkuara kanë mbërritur tashmë në Ukrainë dhe janë në duart e ushtarëve. Paketa e pestë e ndihmës do të përmbajë municione dhe furnizime të tjera.

Njoftimi për ndihmën e re vjen vetëm një javë pasi Shtetet e Bashkuara njoftuan se do të dërgojnë një miliard dollarë shtesë ndihmë ushtarake në Ukrainë.

Shtetet e Bashkuara dhe aleatët e saj po dërgojnë sisteme raketore me rreze të gjatë veprimi në Ukrainë, të cilat ata besojnë se do t’u mundësojnë ushtarëve të luftojnë Rusinë në mënyrë më efektive.