20:18 / E Martë, 02 Gusht 2022 / AR

​Studiuesit zhvillojnë tatuazhe për monitorimin e shëndetit

Studiuesit në Korenë e Jugut po zhvillojnë një pajisje të re për monitorimin e shëndetit në formën e një tatuazhi elektronik që mund të paralajmërojë automatikisht përdoruesin për problemet e mundshme shëndetësore.

Ekipi në Institutin e Avancuar të Shkencës dhe Teknologjisë në Kore ka krijuar një bojë elektronike tatuazhi të bërë nga metal i lëngshëm dhe nanotuba karboni që funksionon në mënyrë efektive si një bioelektrodë.

Pajisja mund të përdoret për të dërguar një lexim të shenjave vitale të përdoruesit nëse lidhet me biosensorë, duke përfshirë për shembull një elektrokardiogram.

Krahas rrahjeve të zemrës mund të përdoret për të lexuar nivelet e glukozës ose laktatit për njerëzit me diabet ose sepsë.

Por studiuesit planifikojnë të heqin dorë nga biosensorët dhe ta dizajnojnë e-tatuazhin si një pajisje plotësisht të pavarur.

“Në të ardhmen shpresojmë të lidhim një çip pa tel të integruar në këtë ngjyrë, që të komunikojmë ose dërgojmë sinjalin përpara dhe mbrapa midis trupit tonë në një pajisje të jashtme,” tha udhëheqësi i projektit, profesor Steve Park.

Ngjyra e tatuazhit është jo invazive dhe nuk kërkon një gjilpërë për t’u futur nën lëkurë si një tatuazh tradicional.

Është bërë nga grimcat e bazuara në galium, një metal i butë, i argjendtë që përdoret gjithashtu në gjysmëpërçues dhe termometra, ndërsa nanotubat e karbonit ndihmojnë në përcjelljen e energjisë elektrike duke përmirësuar qëndrueshmërinë e vetë tatuazhit.

“Kur aplikohet në lëkurë, edhe me fërkim, tatuazhi nuk shkëputet, gjë që nuk është e mundur vetëm me metal të lëngshëm”, tha profesor Park, sipas Sky News.