Kuvendi sërish probleme me mungesë votash, propozohet pushimi veror
Seanca e Kuvendit të Kosovës vazhdojë me akuza e kundër-akuza në mes pozitës dhe opozitës për shkak të bojkotimit të votimit të projektligjeve nga Lidhja Demokratike e Kosovës.
Pasi nisi seanca, deputeti i LDK-së, Armend Zemaj e ripërseriti se koalicioni e ka obligim t’i ketë 61 vota, ndërsa, opozita mbetet për të votuar apo jo.
Kurse, kryetari i Kuvendit Kadri Veseli, ia përmendi demarkacionin me Malin e Zi.
Shefi i grupit parlamentar të Partisë Demokratike të Kosovës, Memli Krasniqi ka thënë se problemet e brendshme të LDK-së, nuk mund t’i kamuflojnë duke i bartur në Kuvendin e Kosovës.
Sërish ka reaguar deputeti i LDK-së, Armend Zemaj, duke thënë se projektligjin për ratifikimin e marrëveshjes financiare për IPA 2017, do ta përkrahin, por votim për demarkacionin nuk ka pas në qeverisjen Mustafa..
Edhe shefi i grupit parlamentar të LDK-së, Avdullah Hoti tha se do të vazhdojnë ta thellojnë bojkotin deri në zgjedhje.
Ndërsa, Kadri Veseli i tha Hotit se Kuvendi nuk është fontan dëshirash.
Pas kësaj Veseli hodhi në votim projektligjin për ratifikimin e marrëveshjes financiare për IPA 2017, pjesa e parë, ndërmjet Kosovës dhe Bashkimit Evropian, por nuk morri dy të tretat e deputetëve.
Sërish reagoi, Memli Krasniqi duke thënë se nuk është normale çdo pesë minuta partitë politike t’i ndërrojnë qëndrimet.
Pas kësaj Veseli thirri mbledhjen e kryesisë për të marrë vendim nëse do të vazhdojnë seancat apo të shpallet pushimi veror.