​Nënvariantet Omicron mund të shkaktojnë valë të reja COVID

Mos mendoni se pandemia e COVID-it po zvogëlohet, pasi ajo mund të zhvillohet dhe të bëhet më serioze, paralajmëruan ekspertët këtë javë.

BA.4 dhe BA.5 janë nënvariantet më të fundit të variantit tejet ngjitës të omicron dhe duket se kanë disa karakteristika që mund të përfaqësojnë një valë të re të COVID.

BA.4 dhe BA.5 në fund të majit u shënuan si “variante të shqetësimit”. Ato u zbuluan për herë të parë në Afrikën e Jugut në janar. Sot, ato po shfaqen gjithnjë e më shumë në SHBA, ku Qendrat për Parandalimin e Sëmundjeve thanë ato tani përbëjnë 21 për qind të rasteve në të gjithë vendin.

“Këto dy nënvariante duket se janë më të mirë në shmangien e mbrojtjes së vaksinës dhe imunitetit nga infeksionet e mëparshme,” thonë ekspertët.

“Jam shumë i shqetësuar”, tha Gregory Poland, kreu i Grupit Kërkimor të Vaksinave të Klinikës Mayo.

Ekspertët thonë se aftësia e BA.4 dhe BA.5 për të shmangur shtresat mbrojtëse i bën më të mundshme ri-infeksionet, gjë që mund të rezultojë në një valë të dytë të virusit.

Omicron prodhoi një formë më të butë të sëmundjes sesa variantet e mëparshme alfa dhe delta, pasi prek kryesisht traktin e sipërm respirator, duke shkaktuar simptoma të ngjashme me të ftohtin ose alergji në vend që të vendoset në mushkëri, gjë që i bëri variantet e hershme kaq vdekjeprurëse.

Por Guardian këtë javë raportoi një studim nga Universiteti i Tokios që sugjeron se nënvariantet BA.4, BA.5 dhe BA.2.12.1 mund të kenë evoluar për të ri-shënjestruar qelizat e mushkërive në vend të indeve të sipërme të rrugëve të frymëmarrjes, duke i bërë ato të ngjashme me alfa ose delta.

“Kërkimi ynë sugjeron se rreziku i këtyre varianteve, veçanërisht BA.4 dhe BA.5, për shëndetin global është potencialisht më i madh se rreziku i BA.2 origjinal,” tha autori kryesor i studimit Kei Sato.

Ekspertët shëndetësorë thonë se BA.4 dhe BA.5 nuk shkaktojnë sëmundje më të rënda dhe vaksinat vazhdojnë të ofrojnë mbrojtje, por njerëzit e pa vaksinuar janë të prekshëm dhe aftësia e vazhdueshme e virusit për të pësuar mutacione do të thotë se pandemia nuk ka mbaruar, shkruan Eatthis.