10 të vdekur nga të shtënat me armë në një dyqan në Colorado

Dhjetë persona, përfshirë një oficer policie, u vranë të hënën pasi një person i armatosur hapi zjarr në një dyqan ushqimesh në Boulder, Colorado, transmeton Indeksonline.

CNN raporton se të shtënat fatale në dyqanin King Soopers vijnë më pak se një javë nga sulmet në zonën e Atlantës ku vdekën tetë persona.

Një i dyshuar është në paraburgim, tha Shefja e Policisë së Boulder Maris Herold, por autoritetet nuk ndanë asnjë informacion mbi llojin e armës së përdorur ose ndonjë motiv të mundshëm.

“Ne do të punojmë gjatë gjithë kohës për ta arritur këtë“, tha ajo, duke shtuar se një hetim i tillë kompleks do të zgjasë të paktën pesë ditë deri në përfundim.

Zyrtarët nuk zbuluan identitetin e viktimave të tjera, duke thënë se ata kishin nevojë që së pari të njoftonin anëtarët e familjes.