Ahmeti: Aktakuza s’ishte e rastësishme nga gjykata ku qërohen hesapet mes forcave të botës, në dëm të Kosovës

Kryetari i Prishtinës, Shpend Ahmeti ka deklaruar se me Hashim Thaçin e Kadri Veselin nuk pajtohet  në shumicën e gjërave, por asnjëherë dhe kurrë s’do të pajtohet që largimi i tyre nga skena politike të bëhet me çdo kusht.

Në reagimin e tij për aktakuzën e ngritur ndaj Thaçit e Veselit, Ahmeti tha se ka qenë dhe vazhdon të jetë ndër përkrahësit më të mëdhenj të zbardhjes së krimeve të luftës, por ka qenë kundër gjykatës që heton vetëm shqiptarët.

Ahmeti deklaroi se dy ditë para një procesi të rëndësishëm në Shtëpinë e Bardhë një komunikatë jehon në krejt botën se krerët e UÇK-së kanë vrarë mbi 100 persona dhe se kjo nuk mund të jetë as rastësisht as me qëllim të mirë, transmeton Indeksonline.

 Postimi i plotë:

Kam qenë dhe do të vazhdoj të jem ndër përkrahësit më të mëdhenj te zbardhjeve të krimeve të luftes. Kam dëshirë që për çdo viktimë të ketë përgjegjësi e çdo familje që ka humbur dikënd të ketë mundësi ta ndjej shijen e drejtësise. Pa dallim nacionaliteti. Pra, në qoftë se dikush ka kryer krime, dua që të dënohet.

Po ashtu, jam i bindur, si qytetar i këtij vendi, duke përjetuar në lëkuren time dhe të familjes sime si edhe çdo familje tjetër në Kosovë se shteti i Serbisë ka kryer një përndjekje, shtypje e agresion etnik rrallë të parë e përjetuar në Evropë. E din secili njeri që ka jetuar në këtë Kosovë tonën.

Prandaj kam qenë kundër gjykates që heton vetëm shqiptarët. Kam pas dëshirë që shteti jonë të hetojë çdo krim të kryer. Çdo njeri që ka kryer një krim si shqiptar nuk ka fol në emër timin dhe nuk do të flas asnjëherë edhe pse thellë besoj se UÇK si organizim nuk ka pas qëllim e as mjet që në mënyrë të organizuar të kryej krime.

Me Kadri Veselin nuk pajtohem në shumicen e gjërave. Me Hashim Thacin edhe më pak. Por, asnjëherë dhe kurrë, nuk do të pajtohem që largimi i tyre nga skena politike të bëhet me çdo kusht. Kur dëmtohet Kosova, dëmtohem unë. Kur dy ditë para një procesi të rëndësishem në Shtëpinë e Bardhë (me të cilin mund edhe të mos pajtohem) një komunikatë jehon në krejt botën se krerët e UÇK kanë vrarë mbi 100 persona, kjo nuk mund të jetë as e rastësishme e as qëllim mirë.

Aman, forca politike bashkonu sepse ditë të vështira janë këto. Politikanët tonë ti gjykojmë ne për krimet e qeverisjes në Kosovë, por jo të krijohet bindja se ne kemi qenë agresori.

Drejtësi për krejt viktimat, ama bash krejt, por jo deklarime politike nga gjykatat ku qerohen hesapet në mes tê forcave botërore, e në dëm të Kosovës.