Serweri për dialogun Kosovë – Serbi: Dyshoj se do të ketë marrëveshje për gjëra të mëdha!

Eksperti amerikan për çështje të Ballkanit, Daniel Serwer, thotë se Administrata amerikane është e interesuar për zhvillimin e ekonomisë midis dy vendeve, andaj ekonomia është paralajmëruar si temë kryesore e takimit Kosovë – Serbi më 4 shtator në Uashington.

Mirëpo, ai në një intervistë për gazetën serbe “Danas”, nuk përjashtoi mundësinë që të arrihet edhe “ndonjë marrëveshje për “Trepçën” dhe Liqenin e Ujmanit.

Sipas profesorit në universitetin “Jons Hopkins”, është e mundur të arrihet një marrëveshje për zona speciale ekonomike përgjatë kufirit Kosovë – Serbi.

“Dyshoj se do të ketë marrëveshje për gjëra të mëdha të cilat ndikojnë në normalizimin e marrëdhënieve mes dy vendeve, pasi krijohet përshtypja se Beogradi nuk është i interesuar të pranojë pavarësinë e Kosovës, kurse Prishtina nuk mund të pranojë asgjë më pak se kjo. Kryeministri Hoti ka një shumicë të vogël në Parlament dhe nuk dëshiron të rrezikojë”, ka vlerësuar Serweri.

Termini për takim midis krerëve të Kosovës dhe Serbisë, i caktuar së fundi për 4 shtator është i treti. Në dy të parët, më 27 qershor e 2 shtator, nuk pati takime.