Në gusht mbi 800 mijë kosovarë në Shqipëri, javën e parë të shtatorit hynë 90 mijë persona nga Kosova

Muaji gusht ka shënuar fluksin më të lartë të turistëve nga Kosova drejt bregdetit shqiptar. Sipas të dhënave zyrtare nga policia kufitare e Kosovës, gjatë 31 ditëve të këtij gushti janë futur në Shqipëri mbi 813 mijë turistë.

Edhe pse flitet për një fluks të lartë, sërish kjo shifër është më e ulët se e njëjta periudhë e vitit të kaluar.

 “Më 2019 kanë ardhur gjithsej 1 milion 324 mijë persona, ndërkohë që këtë muaj kanë hyrë 813 mijë persona, 39% më pak se viti i kaluar”, thotë Nexhmi Krasniqi,  drejtor i policisë kufitare, në veriperëndim të Kosovës.

Pas javës së parë të shtatorit, janë regjistruar 90 mijë persona hyrje nga Kosova drejt Shqipërisë  me 19 mijë automjete.

Ndërkohë fluksi i lartë i lëvizjeve, ka shtuar edhe tentativat e trafiqeve të lëndëve të ndaluara në kufi, ku përveç kapjes e sasive të vogla nuk kanë munguar as ato me sasi më të mëdha.

Policia kufitare e Kosovës ka kapur 13 raste të trafiqeve të drogës nga Shqipëria në drejtim të Kosovës, nga të cilat edhe një rast ku janë kapur 6 kilogramë lëndë narkotike kanabis sativa.