Kosova, e “pakoordinuar” në masat kundër përhapjes së pandemisë

Pëllumb Bajçinovci, pronar i një biznesi në fushën e gastronomisë në Prishtinë, thotë se ka pasur humbje të mëdha nga vendimet e papritura të Qeverisë së Kosovës për parandalimin e përhapjes së COVIDIt-19. Për Radion Evropa e Lirë, ai thotë se ishin të papërgatitur për një vendim të tillë, që sipas tij, ishte aq i shpejtë sa që krijoi edhe panik te qytetarët.

“Si çdo herë, bëhen përgatitje për vikend me staf, me mjete të tjera dhe një vendim për masa të reja, normalisht, që krijon humbje për biznesin. Kemi pasur humbje të mëdha edhe nga masat në të kaluarën. Këto vendime të shpejta duhet ndalur. Duhet të bëhen plane afatgjatë në mënyrë që të mbijetojë biznesi”, thotë ai.

Me qëllim frenimin e përhapjes së koronavirusit në fundjavën që shkoi, në Kosovë ka qenë e ndaluar veprimtaria e të gjitha subjekteve afariste dhe bizneseve. Në këtë periudhë janë mbyllur edhe qendrat tregtare dhe rekreative dhe subjektet që ofrojnë shërbime të gastronomisë, në të gjithë territorin e Kosovës.

Kryeministri i Kosovës, Avdullah Hoti, në një intervistë për Radion Evropa e Lirë, të martën paralajmëroi se Kosova po shkon sërish drejt mbylljes totale, për shkak të përkeqësimit të situatës epidemiologjike. Ai tha se i kupton shqetësimet e bizneseve, por se primare është “ruajtja e shëndetit publik”.

Nga ana tjetër, drejtori ekzekutiv i Odës Ekonomike Amerikane, Arian Zeka thekson se masat për parandalimin e përhapjes mëtejme të COVIDIT-19 që po i vendos Qeveria e Kosovës, po bëhen pa ndonjë koordinim me bizneset, por edhe midis vetë institucioneve. Kjo gjë, shton ai, po dëmton edhe më shumë bizneset. Mungesa e koordinimit, sipas tij, çon edhe në dykuptimësi dhe po ka kundërshti midis insitucioneve sa i përket përmbajtjes së vendimeve.

“Sektori i ndërtimtarisë lejohej të punonte, ndërkohë në disa komuna ishte ndaluar hyrja dhe dalja e qytetarëve. Po ashtu pikat e shitjes së materialit ndërtimor nuk ju lejohej të punonin”, thotë Zeka.

Për masat e fundit që u propozuan nga autoritetet shëndetësore dhe të cilat janë në diskutim në Qeverinë e Kosovës, komuniteti i biznesit, thotë Zeka, vetëm se u informua paraprakisht nga ministri i Shëndetësisë, Armend Zemaj, ndërkaq për kërkesat e bizneseve u sugjerua të vazhdonin diskutimin me ministritë e tjera.

“Kemi kërkuar nga qeveria që secila masë që kufizon aktivitetin ekonomik të ndërlidhet me masa përkrahëse financiare për bizneset. Pse të mos vazhdohet kompensimi i pagave dhe kompensimi i qirave për bizneset private, sidomos ato që po pësojnë rënie në qarkullim e prej 20 për qind e më shumë. Po ashtu të mos përfitojnë të gjithë bizneset në mënyrë të njëjtë, ato që goditen më shumë të kenë përkrahje më të madhe”, thotë Zeka.

Shoqata e Gastronomëve të Kosovës ndërkohë ka bërë të ditur se kundërshton çdo vendim për mbyllje të mëtutjeshme të bizneseve, nëse ato nuk subvencionohen dhe mbështeten me pako strategjike për mbulimin e dëmeve.

Mbyllja e bizneseve për dy ditë, sipas Odës Ekonomike të Kosovës mund t’i ketë kushtuar ekonomisë së Kosovës humbje deri në 15 milionë euro.

Në diskutim e sipër janë vendosja e masave te reja nëpër komuna, varësisht prej numrit të të infektuarve.

Pëllumb Bajçinovci, pronar e një biznesi të gastronomisë në Prishtinë, thotë se masat që duhet të jenë në fuqi janë ato të cilat kryesisht po përdoren në mbarë botën: maska dhe distanca.

Ndërkaq, sipas tij, ata të cilët nuk respektojnë këto masa, duhet të gjobiten.

“Duhet menduar që edhe krejt viti tjetër të jetë në këtë formë, prandaj duhet të krijohet një strategji afatgjate”, thotë ai.