Publikohet albumi ‘Rrugës’ nga Shpat Deda

Kantautori Shpat Deda e ka publikuar mbrëmë albumin e tij të tretë me titull: “Rrugës” në platformat kryesore digjitale online siç janë “Spotify”, “Apple Music”, “Deezer”, “iTunes”, “Amazon Music”, e kështu me radhë.

Si përgjegje ndaj situatës së rënduar me pandeminë dhe me qëllim të ngrohjes në fund të këtij viti të zymtë, kantautori ka zgjedhur ta promovonte albumin edhe në Youtube, ku shoqërohet nga ilustrimet origjinale dhe shumë të veçanta të albumit.

Në këtë formë, albumi “Rrugës” është dhuratë për të gjithë ata që duan ta dëgjojnë dhe mund të gjendet në të gjitha faqet zyrtare të kantautorit dhe në www.shpatdeda.com.

Surpriza e madhe e këtij albumi është bashkëpunimi i Shpat Dedës me artisten britanike me famë ndërkombëtare Joss Stone në këngën “Marinari i vogël”, ku Joss Stone këndon krahas Shpatit në gjuhën shqipe.