Vendos KQZ-ja, do të rinumërohen 494 vendvotime

Komisioni Qendror i Zgjedhjeve (KQZ) në mbledhjen e radhës ka marrë vendimin se do të rinumërohen votat e 494 vendvotimeve.

KQZ-ja i ka ndarë në katër kategori vendvotimet, votat e të cilaave do të rinumërohen, për arsye të mospërputhjeve të formularëve të rezultateve.

Sipas KQZ-së arsyet e rinumërimit kanë të bëjnë me: bartje të gabuar të votave në formularin e subjekteve politike (35 vendvotime); bartje të gabuar të votave në formularin e kandidatëve (6 vendvotime); kandidati apo kandidatët kanë më shumë vota se subjekti politik (370 vendvotime); dhe subjekti ka vota, ndërsa kandidatët jo dhe anasjelltas (83 vendvotime).

Kryeshef ekzekutiv i sekretariatit të KQZ-së Burim Ahmetaj ka thënë se në 370 vendvotime një kandidat ka më shumë vota se subjekti, duke rekomanduar që këto vendvotime që të shkojnë në rinumërim.

“Është duke vazhduar procesi i skanimit të rezultateve që kanë mbetur edhe dy komuna. Nga shërbimi votues nga 19 mijë pako të vlerësuara deri tani janë aprovuar mbi 22 mijë zarfe të refuzuara janë pjesa tjetër dhe të proceduara janë mbi 31 zarfe nga 19 mijë pako”.

“Sa i përket procesit të materialit të zgjedhjeve të kandidatëve QNR-ja pothuajse i ka proceduar të gjithë formularët që nuk kanë pasur probleme teknike”.

“Janë 35 vendvotime që nuk kanë mundur të kalonin audutimin. Kategoria e tretë që ka numrin me të madh të vendvotimeve është që duhet të vërehet rinumërimi ku janë 370 vendvotime ku një kandidat ka më shumë vota se sa subjekti dhe për këtë është rekomandimi që të kemi rinumërim”.

Ndërsa, Sami Kurteshi ka kërkuar që të krijohet një komision që të verifikohet secila votë veç e veç. Kurteshi madje ka thënë se asnjëherë nuk është publikuar lista e atyre që u është refuzuar vota nga jashtë.

“Procedimi i votave nga jashtë ne jemi duke përcjell krejt procedurën në QNR dhe kemi vërejtje që dua t’i them”.

“Ne kemi disa arsyetime ku ka raste se personat kanë aplikuar dhe dalin se nuk kanë aplikuar ka raste ku aplikacioni është refuzuar, por në të vërtetë nuk është refuzuar dhe kjo është çështje që len mjaft dilema”.

Kurteshi ka përmendur që disa parti të komunitetit boshnjak kanë marrë vota në disa vende nuk ka pjesëtar të këtij komuniteti, siç thotë ai për këto raste KQZ-ja po hesht.

“Ka raste kur në disa komuna ku nuk ka pjesëtarë të komunitetit boshnjak partitë boshnjake kanë marrë shumë vota ajo diskutohet në publik, KQZ-ja hesht”.