Mjekja nga Vitia jep detaje të reja për vdekjen e 16-vjeçarit nga koronavirusi

Në prag të njëvjetorit të pandemisë, në mëngjesin e të enjtes e ka humbur betejën me COVID-19 një 16-vjeçar nga Vitia.

QKMF në këtë komunë thotë se i riu kishte edhe sëmundje tjera shoqëruese, por që sipas tyre virusi ia përkeqësoi gjendjen.

I riu tashmë i ndjerë kishte marrë tretman edhe në QKMF-në e Vitisë por menjëherë me rekomandim të mjekëve është dërguar në Spitalin rajonal të Gjilanit.

Drejtoresha e Qendrës Kryesore të Mjekësisë Familjare në Viti thotë se 16-vjeçari ishte hospitalizuar që nga marsi.

“Në Viti pacienti është paraqitur nga 1 marsi kur kishte temperaturë. Ishte i zënë në fyt dhe saturimin e ka pasur diku 87%. Mjeku i urgjencës kur e ka parë gjendjen e tij me ambulancë e ka përcjellë në Spitalin Rajonal të Gjilanit”, deklaroi për RTV Dukagjinin, Vjollca Kadolli-Halili.

“Fatkeqësisht pacienti kishte sëmundje shoqëruese që nga lindja. Për ne ka qenë rast i njohur pasi është trajtuar shumë herë për probleme të ndryshme shëndetësore. Ai ka qenë me retardim, por që gjendje i është përkeqësuar pasi është prekur nga coronavirusi”.Varrimi i të ndjerit është bërë në varrezat e fshatit Verban.