Ministri Murati del me sqarim për shtesat e skemës sociale dhe për pensionet e “ulura”

Ministri i Financave, Hekuran Murati ka sqaruar vendimin e djeshëm të Qeverisë së Kosovës për ndarjen e skemave sociale dhe atë pensionale.

Murati ka thënë se rritja e pensionit për 30 euro vlente vetëm për 3 muaj, janar, shkurt e mars dhe sipas tij ky ishte vendim i Qeverisë së kaluar në prag të fushatës zgjedhore.

Murati ka thënë se do të aplikohet një pako shtesë në përkrahje të skemave sociale.

“Sqarim lidhur me vendimin e djeshëm për shtesat e ndara për skemat sociale dhe pensionale
Nga pakoja e djeshme prej 20 milionë euro e miratuar në qeveri, pjesa më e madhe e saj, 8.5 milionë euro janë ndarë për të mbështetur skemat e pensioneve që marrin nën 100 euro, si dhe familjet në asistencë sociale.
Sa u përket shtesave për pensionet bazike, qeveria e kaluar në kohë fushate, kishte marrë vendim për të ndarë nga 30 euro për vetëm tre muaj (janar, shkurt dhe mars).

Dhe pas marsit e tutje, shtesat ishte paraparë të ndalen në tërësi.
Me pakon e re, kemi shtuar 8.5 milion euro, aty ku qeveria e kaluar kishte buxhetuar 0 euro shtesa. Pra për muajt prill e tutje, nuk ka pasur shtesa të planifikuara.

Krejt çka do të merrnin pensionistët pa vendimin e djeshëm të qeverisë, do të ishte shuma prej 75 ose 90 eurove, ashtu siç është e planifikuar në buxhetin e vitit 2021, të miratur në Kuvend.
Ministria e Finacave, Punës dhe Transfereve, ka paraparë që për kategoritë e skemave pensionale që marrin nën 100 euro – e këtu ka kategori me 75 euro dhe me 90 euro – të aplikohet një shtesë, asisoj që shuma totale e pensionit me gjithë shtesën të jetë 100 euro.
Këto shtesa do të vazhdojnë përgjatë tërë vitit, njësoj sikurse mbështetja për përfituesit e asistencës sociale” shkruan Murati në njoftim./Indeksonline/