Henry për Arsenalin: Klubi po udhëhiqet nga njerëz që nuk e njohin futbollin

Thierry Henry thotë se ai nuk e njeh më Arsenalin – pas përfshirjes së tyre në themelimin e Superligës Evropiane.

Arsenali u emërua si një nga 12 ekipet themeluese për Superligën Evropiane, ku shkaktoi reagim të ashpër në opinion.

Presioni nga tifozët dhe figurat e profilit të lartë bëri që të gjashtë klubet e Premier League të tërhiqeshin.

“Unë nuk e njoh klubin tim dhe atë që ndodhi tani, ata përpiqen të bashkohen në një kampionat që do të ishte mbyllur, nuk ka kuptim për mua,” tha legjenda e Topçinjve për The Telegraph.

“Ata e kanë drejtuar klubin si një kompani, jo si një klub futbolli, dhe ata treguan dorën e tyre. Ndoshta kjo është një mungesë e të kuptuarit të vlerave thelbësore të futbollit dhe ndoshta paratë ishin shumë të mëdha, pasi u tunduan. Sido që të ishte, ata gabuan shumë. Jam krenar për atë që arritën tifozët. Jo vetëm tifozët e Arsenalit, të gjithë tifozët. Rezultati ishte një fitore për futbollin”, përfundoi ai.