Qeveria ende pa plan se ku do t’i strehojë afganët

I është dhënë drita e gjelbër SHBA-së për pranimin e refugjatëve nga Afganistani në Kosovëm, mirëpo Qeveria e Kosovës ende nuk ka një plan konkret se ku do t’i strehojë. Eksperti i sigurisë Nuredin Ibishi thotë se Qeveria duhet dhënë një shpjegim më të gjerë për refugjatët.

Në këtë kamp në Vushtrri aktualisht ndodhet KFOR-i francez.

Mirëpo brenda tij ekziston mundësia që të strehohen edhe refugjatët të cilët pritet të vijnë nga Afganistani në Kosovë.

Kështu është raportuar gjatë ditëve të fundit.

Por për këtë një punëtor brenda kampit në kushte anonime ka thënë për T7 se ky kamp nuk mund të bëhet shtëpia e afganëve.

Kjo pasi që në të nuk ka kapacitete dhe hapësirë për strehimin e tyre.

Ndërkaq nga Ministria e Punëve të Brendshme nuk kanë dalë ende me një vendim se ku do të vendosen refugjatët.

Por sipas ekspertit të sigurisë ekzistojnë disa lokacione ku ata mund të gjejnë strehë.

E institucionet shtetërore kanë lajmëruar se të gjithë ata që vijnë do të verifikohen nga organet përgjegjëse.

Mirëpo Ibishi thotë se verifikimi në këto kushte është i vështirë.

Sipas Ibishit Kosova nuk ka kapacitete të mjaftueshme për t’i mbajtur refugjatët gjatë në Kosovë.

Prandaj sipas tij Qeveria duhet të dalë dhe të tregojë se deri kur pritet të qëndrojnë ata këtu.