Shtetet e Quintit i bëjnë thirrje Qeverisë së Kosovës që të veprojë për Manastirin e Deçanit

Shtetet e Quintit kanë bërë edhe një thirrje për Qeverinë e Kosovës që të veprojë në lidhje zbatimin e regjistrimit të Masnastirit të Deçanit, karshi vendimit të Gjykatës Kushtetuese.

Madje, Quinti ka kërkuar nga Qeveria Kurti që të mos vonohet për këtë.

“Në maj të vitit 2016, Gjykata Kushtetuese e Kosovës vërtetoi pronësinë e Manastirit të Deçanit mbi disa hektarë tokë. Përkundër këtij vendimi të ligjshëm dhe kërkesave pasuese, vendimi i Gjykatës ende nuk është zbatuar.

Zbatimi i ligjit dhe respektimi i pavarësisë së gjyqësorit janë obligime të të gjitha qeverive të zgjedhura në mënyrë demokratike. Po ashtu, ato janë parakushte për konsolidimin demokratik të Kosovës dhe integrimin e saj në institucionet evropiane dhe euroatlantike.

Shefat e misioneve të Francës, Gjermanisë, Italisë, Mbretërisë së Bashkuar dhe Shteteve të Bashkuara të Amerikës janë të bashkuar në mbështetjen e tyre për të ardhmen demokratike dhe evropiane të Kosovës. Prandaj, sërish i bëjmë thirrje qeverisë së Kosovës që, në përputhje me vendimin e Gjykatës Kushtetuese, të veprojë pa u vonuar për zbatimin e plotë të regjistrimit të ligjshëm të tokës së Manastirit të Deçanit” thuhet në thirrjen e Quintit për Qeverinë e Kosovës./Indeksonline/