01:03 / E Premte, 15 Dhjetor 2017 / indeksADMonline
Grubi përmbyll debatin për gjuhën pa asnjë amandament të pranuar
Sonte, para mesnatës, Komisioni për Çështje Evropiane dhe Komisioni Juridik-Ligjvënës, e përmbyllën vazhdimin e dytë, dita e tretë e diskutimit për amendamentet në lidhje me Propozim-ligjin për përdorimin e gjuhëve.
Komisioni për Çështje Evropiane, tre ditë pune zhvilloi diskutim për amendamentin e parë, ndërsa në diskutimin për amendamentin morën pjesë deputetët: Artan Grubi, Vesel Memedi, Rexhail Ismaili, Ejup Alimi, Xhevat Ademi dhe Rexhep Memedi.
Në kuadër të kushteve të paraparë në nenin 171-v paragrafi 1 i Rregullores së Kuvendit të Republikës së Maqedonisë, Komisioni nuk arriti të prononcohet për amendamentin e parë.
Për arsyen e njëjtë në pajtim me Rregulloren, Komisioni për Çështje Evropiane nuk zhvilloi diskutim edhe për amendamentet tjera të parashtruara sepse skadoi afati prej më së shumti tre ditë pune për zhvillimin e diskutimit për amendamentet.
Me atë, Komisioni për Çështje Evropiane e mbylli mbledhjen e 6-të pa asnjë amendament të pranuar nga gjithsej 90 amendamente të parashtruara, dhe Propozim-ligjin për përdorimin e gjuhëve e përcjell në procedurë të mëtutjeshme në Kuvendin e Republikës së Maqedonisë.
Për referues në seancën e Kuvendit u zgjodh Kryetari i Komisionit, z. Artan Grubi.
