Ian Wright mbron Xhakën: Ka qenë fantastik këtë vit, nuk ishte fajtor për barazimin ndaj Liverpoolit

Ian Wright ka mbrojtur mesfushorin e Arsenalit, Granit Xhaka, pas pretendimeve se ai zgjoi tifozët e Liverpool në barazimin e djeshëm 2-2.

Arsenali e nisi shkëlqyeshëm në Anfield, duke kaluar dy gola në avantazh pas golave të Gabriel Martinelli dhe Gabriel Jesus.

Më vonë, Xhaka e humbi gjakftohtësinë pasi ndjeu se ishte faulluar nga Ibrahima Konate, dhe disa sekonda më vonë u përlesh me Trent Alexander-Arnold, ku më pas u ndez “turma”.

Pavarësisht kritikave nga Gary Neville dhe Jamie Carragher, Wright beson se Xhaka nuk ishte fajtori për barazimin e “Topçinjëve”.

“Nuk duhet shumë për të nxitur atë tifozeri. Xhaka ka qenë i shkëlqyer për ne këtë sezon. Unë nuk e shoh si fajtor për barazimin. Ajo që unë do të vendosja si fajtor është se si ne nuk ishim në gjendje të shihnim dhe të vazhdonim të luanim siç bëmë në pjesën e parë, por mendoj se do të kemi mësuar shumë nga ajo lojë”.“Shumë njerëz kanë shkuar në Liverpool dhe nuk e kanë marrë atë. Duhet të jemi të kënaqur me këtë pikë. Ne nuk kemi fituar atje që nga viti 2012, kështu që duhet ta marrim atë pikë dhe të jemi shumë të lumtur”, përfundoi Wright.