Adriana Matoshi reagon për herë të parë pas operimit: Iku edhe tumori i tretë, po kthehna!

Deputetja e Kuvendit të Republikës së Kosovës, njëherazi edhe aktorja e njohur shqiptare, Adriana Matoshi, ka kaluar me sukses operimin e tretë për tumor.

Ditë më parë, ajo njoftoi se po nis një rrugëtim të ri në spitale, për të marrë tretmanin e nevojshëm lidhur me këtë problem serioz shëndetësor.

Përmes një reagimi në profilin e saj zyrtar në Facebook, Matoshi ka deklaruar se ka marrë mesazhe të shumta motivuese dhe fjalë të ngrohta nga rrethi i saj.

“Sot po ndihem ma mirë. Iku dhe tumori i tretë. U zgjova ma në fund edhe prej një andrre të keqe. Kur e pashë interesimin e përkrahjen e të gjithëve ju, u binda që kam ma ia dalë prapë” ka thënë mes të tjerash Matoshi.

Ky është reagimi i plotë i saj:

Nuk mund të mos a mbaj premtimin. Po kthehna!

Me fitoren e tretë.

Prej ditës kur ju informova për sfidën tem të re, telefoni nuk u ndalë prej mesazheve e telefonatave.

Vazhdimisht jam prezente në klinika e spitale të ndryshme. Kur shkoj e takoj prindë të pashpresë për fëmijët e tyne, ju jap motiv e tentoj me i gjetë fjalët ma të duhuna që ia ngrohin zemrën një prindi në ato çaste.

Tash e di dhe vet sa peshë paska prezenca e fjalët e ngrohta.

Në situata të tilla jemi krejt të barabartë. Njerëz të thjeshtë prej trupi, shpirti e zemre.

Sot po ndihem ma mirë. Iku dhe tumori i tretë.

U zgjova ma në fund edhe prej një andrre të keqe.

Kur e pashë interesimin e përkrahjen e të gjithëve ju, u binda që kam ma ia dalë prapë.

Uroj të jetë sfida e fundit në lidhje me shëndetin.

Falenderoj Zotin që pranoi lutjet tona, e më drejtoi si gjithmonë tek doktorë profesionistë të cilët ma shpëtojnë jetën qe disa herë.

Falenderoj mikeshën time Sellma Dubova, një feministe e punëtore e pashoqe për krejt ata që e njohin.

Falenderoj dr. Hetem Ramadanin për krejt këshillat qysh me e mbrojt shëndetin e me ngritë imunitetin me disiplinën ditore.

Falenderoj zemrën tem, shoqen tem që këto ditë ka qëndru afër meje.

Vali përjetësisht të jam mirënjohëse.

Rina Zeka për krejt ato mesazhe t’omla e motivuese, t’du yll.

Gjunjëzohem para dashnisë tuaj t’pastër.

Ashtu qysh premtova, unë po kthehna.

Shihemi së shpejti…

Ju dua