Kosova 25-vjet pas çlirimit, Kurti do të flasë para studentëve amerikanë

Kryeministri i Republikës së Kosovës, Albin Kurti, sot do të mbajë një ligjëratë në një ligjëratë në Universitetin Yale, përkatësisht Shkollën Jackon për Çështje Globale, në Connecticut të ShBA-së.

Kurti do të flasë mbi progresin demokratik dhe rritjen ekonomike si dhe rritjen e rrezikut nga Rusia dhe Serbia, 25 vjet pas çlirimit të vendit.

Ligjërata në fjalë do të fillojë nga 18:10 me orën lokale në Kosovë, ndërsa në ora 12:10 me orën lokale në Shtetet e Bashkuara të Amerikës. 

Ndryshe, kryeministri Albin Kurti është takuar me mërgimtarë në Shtetet e Bashkuara të Amerikës dhe me përfaqësues të shoqatave shqiptare.

Zyra e Kryeministrit ka njoftuar të dielën se Kurti i ka ftuar mërgimtarët të investojnë në Kosovë për të fituar.

“Nëse para tri dekadave, juve të dashur bashkatdhetarë ju kemi thënë sakrifikoni për të kontribuar, tash ju themi investoni për të fituar”, ka thënë Kurti, thuhet në komunikatë.

Kurti ka folur për zhvillimin ekonomik në Kosovë, sundimin e ligjit dhe progresin demokratik si karakteristika që, sipas tij, kanë përshkruar Qeverinë e Kosovës.

“Veçoi mbështetjen për gratë dhe vajzat, si në edukim ashtu edhe në punësim dhe rritje të bizneseve të tyre, duke shtuar rëndësinë e fuqizimit të grave brenda shoqërisë, ndërsa potencoi se është rritur buxheti i shtetit dhe është investuar në fushat e sektorët kyç si mbrojtje, arsim, edukim, shëndetësi, bujqësi e energji. Ai i njoftoi edhe me politikat e qeverisë për diasporën, me qëllim përfshirjen sa më të madhe të saj në zhvillimin social dhe ekonomik. Ndër to u theksua Dritarja për Investime të Diasporës, përmes së cilës synohet t’i garantohen huatë e bizneseve me pronarë nga mërgata që duan të investojnë në Kosovë. Me këtë rast ai u bëri ftesë atyre që të shohin mundësitë që ofron Kosova për investime dhe t’i shohin si mundësi për ta dhe për partnerët e tyre biznesor”, thuhet në komunikatë.