Renault 4 rikthehet në version 4×4
Renault jeton në stilin retro. Disa do të thonë se Renault po vuan nga kreativiteti, dhe disa do të thonë thjesht se kanë gjetur përsëri një minierë ari.
Gjithsesi, retro është në modë, dhe marka franceze e bën një punë të shkëlqyer me këtë. Renault 5 u rikthye dhe u bë Makina Evropiane e Vitit, dhe më pas mbërriti “katërshja”, transmeton Telegrafi.
Tani, është zbuluar një koncept që paralajmëron një version të ri dhe më të fuqishëm të modelit elektrik crossover. Nëse ky opsion realizohet, R4 do të ketë tërheqje në të gjitha rrotat dhe dy motorë elektrikë.
Domethënia e kësaj shpjegohet më së miri nga emri R4 Savane, i cili i kujton një prej versioneve më të famshme të “katërshes” origjinale.
Risia më e madhe në koncept është implementimi i një motori elektrik shtesë në boshtin e pasmë, duke siguruar tërheqje në të gjitha rrotat.
Nëse i shtojmë të gjithave faktin që shasia është ngritur me 15 mm shtesë dhe gjurmët e rrotave janë rritur, është e qartë se fotot promovuese tregojnë shpirtin aventuresk të makinës.
Me konceptin, Renault prezanton një nuancë të re të karrocerisë, Jade Green, dhe në vend të çatisë standarde, ajo ka një çati të butë tekstili me një printim.
Parakolpët e printuar në 3D janë më të qëndrueshëm dhe kanë aftësinë të thithin energjinë e impaktit. Së fundmi, ka fellne 18-inç të projektuara posaçërisht me goma Goodyear UltraGrip.
Dizajnerët francezë u morën edhe me brendësinë. Ulëset janë të veshura me pëlhurë ngjyrë kafe të errët, me një model të mrekullueshëm pepita në mbështetëset e shpinës dhe në panelet anësore. Tonet kafe vazhdojnë në panelin e instrumenteve.
Renault 4 E-Tech është në dispozicion në treg me një motor të vetëm elektrik, tërheqje në rrotat e përparme dhe një zgjedhje fuqie midis 118 dhe 148 kuaj-fuqi.
Duke instaluar një motor shtesë, fuqia mund të rritet në 300 kuaj-fuqi, pothuajse dhjetë herë më shumë se origjinali nga viti 1961.
Renault ende nuk e ka konfirmuar nëse Savane do të hyjë në prodhim serik, por ata njoftojnë se ky koncept tregon se çfarë është e mundur në platformën AmpR Small, e cila përdoret edhe nga Renault 5 E-Tech i ri dhe Alpine A290 sportiv.
Kjo nuk është përpjekja e parë e Renault për të prezantuar Model 4 në një version off road. Disa vite para se të prezantohej versioni i prodhimit, koncepti 4ever Trophy tashmë linte të kuptohej se mund të kishte një version më aventuresk.
Sidoqoftë, është një koncept shumë interesant që shumë do të donin ta shihnin në shitje, shkruan telegraf.
Nëse vërtet merr miratimin për prodhim, ky model do të ketë një çmim më të lartë se Renault 4 standard me një bateri më të madhe, i cili shitet në Francë me një çmim fillestar prej 31,490 eurosh, duke përfshirë një bonus mjedisor prej 2,000 eurosh.
