Abdixhiku ka dy fjalë për intervistimin e Faton Pecit

Kryetari i LDK-së, Lumir Abdixhiku, ka reaguar pas intervistimit të ministrit në detyrë të Bujqësisë, Pylltarisë dhe Zhvillimit Rural, Faton Peci.

Peci u mor sot në pyetje në cilësinë e të dyshuarit nga Njësia e Veçantë Hetimore e Policisë së Kosovës, teksa Abdixhiku thotë se shpreson të ketë lindur guximi i prokurorëve që të trajtojnë secilin akt korruptiv, shkruan IndeksOnline.

“Le të shpresojmë e besojmë, se pas aq shumë vitesh pritjeje, një guxim i tillë tashmë ka lindur. Dhe me të, ka lindur dhe një epokë e re e popullit tonë. Në këtë epokë, një e vërtetë e pashmangshme do të qëndrojë gjithëherë – se paret e vjedhura nga ata që e shohin veten mbi shtet, ligj e vend, do të kthehen cent më cent. Nga të gjithë!” shkroi Abdixhiku.

Kujtojmë se bastisjet e sotme në MBPZHR dhe tri lokacione të tjera patën të bëjnë me dhënien me qira të fabrikës për përpunimin e nënprodukteve shtazore.

Ky është postimi i plotë i Abdixhikut:

Edhe në Kosovë, sikurse në secilin vend tjetër në Evropë, do të del një ditë një prokuror a dy, djem e vajza të reja e të rinj, që kanë guxim e integritet të trajtojnë secilin akt korruptiv; secilën hajni.

Edhe atë të pushtetarëve.

Sidomos atë të pushtetarëve.

Atë ditë do të mburremi të gjithë – me shtetin tonë, me arritjet tona; me integritetin e njerëzve që i shërbejnë popullit të tyre pa frikë. Atë ditë, piskamat e politikanëve që mbrojnë hajninë vetëm pse hajni është i tyre – atë që u bërtet me fakte mu para syve – atë ditë, këto piskama nuk do të kenë më asnjë vlerë.

Le të shpresojmë e besojmë, se pas aq shumë vitesh pritjeje, një guxim i tillë tashmë ka lindur. Dhe me të, ka lindur dhe një epokë e re e popullit tonë. Në këtë epokë, një e vërtetë e pashmangshme do të qëndrojë gjithëherë – se paret e vjedhura nga ata që e shohin veten mbi shtet, ligj e vend, do të kthehen cent më cent. Nga të gjithë!