Në prag të takimit në Alaskë/ Trump: Putin nuk do të luajë me mua

Presidenti amerikan, Donald Trump është pyetur në zyrën Ovale nga gazetarët, nëse homologu rus, Vladimir Putin ka një armë të fortë për takimin e së premtes në Alaskë.

“Epo, ai erdhi në vendin tonë,” u përgjigj Trump, shkruan Sky News.

Ai u tha gazetarëve se mendon që Putini “do të donte të shihte një marrëveshje”.

“Mendoj se nëse nuk do të isha president, ai do të merrte kontrollin e të gjithë Ukrainës, është një luftë që nuk duhet të kishte ndodhur kurrë. Nëse unë nuk do të isha president, sipas mendimit tim, ai do të preferonte shumë më tepër të merrte kontrollin e të gjithë Ukrainës, por unë jam president dhe ai nuk do të luajë me mua.”, shtoi ai.

Trump gjithashtu propozoi Alaskën si mikpritëse për takimin e dytë, të cilin ai thotë se do të donte të ndodhte “shumë shpejt”.

Bisedimet në Alaskë ndodhin në një moment kyç, me Trumpin gjithnjë e më të zemëruar me Putinin dhe presidentin rus që nuk tregon shenja se do të heqë dorë nga kërkesat maksimaliste të Kremlinit.

Trump dhe Putin kanë zhvilluar gjashtë biseda telefonike, dhe i dërguari kryesor i Shtëpisë së Bardhë ka vizituar Moskën të paktën tri herë.

Vendimi për t’u takuar me Putinin – diçka që paraardhësi i Trumpit, Joe Biden, refuzoi ta bënte pas pushtimit të Ukrainë – pasqyron besimin e presidentit Trump se raporti i tij me liderin rus do të sjellë një marrëveshje paqeje të qëndrueshme.