Nuk i shërbeu kafen, godet me kosë kamarierin – arrestohet 56-vjeçari në Bushat

Një ngjarje e rëndë ka ndodhur mbrëmjen e së premtes në qendër të Bushatit, ku një konflikt për motive të dobëta mes dy personave ka përfunduar me dhunë fizike dhe plagosje të rëndë.

Sipas informacioneve zyrtare nga Policia e Shkodrës, shtetasi B. Sh., 56 vjeç, ka goditur me një mjet prerës, kosë, kamarierin P. V., 39 vjeç, pasi dyshohet se ky i fundit nuk i ka shërbyer kafe, duke i shkaktuar dëmtime në kokë, trup dhe një frakturë, thyerje në krahun e djathtë.

Ngjarja ndodhi në ambientet e një lokali në qendër të Bushatit.

Pas marrjes së njoftimit, shërbimet e Komisariatit të Policisë Vau i Dejës ka arrestuar në flagrancë shtetasin B. Sh., 56 vjeç, banues në fshatin Mali i Jushi.

Mjeti prerës, kosë, u sekuestrua në cilësinë e provës materiale, ndërsa i plagosuri ndodhet nën kujdesin e mjekëve dhe është jashtë rrezikut për jetën.

Materialet procedurale janë referuar në Prokurorinë pranë Gjykatës së Juridiksionit të Përgjithshëm Shkodër, për vijimin e hetimeve./EuronewsAlbania/