Osmani: Në Ditën Ndërkombëtare për Eliminimin e Dhunës ndaj Grave, apeloj për VEPRIM

Presidentja e Republikës së Kosovës, Vjosa Osmani, ka deklaruar se femicidi është plagë e hapur.

Duke shpërndarë një fotografi të Presidencës, të ndriçuar me ngjyrë portokalli në ditën ndërkombëtare kundër dhunës me bazë gjinore, presidentja u shpreh se rastet e dhunës ndaj grave dhe dhunës në familje po thotë troç që letrat nuk shpëtojnë jetë.

“Sepse pas çdo shifre fshihet një jetë e thyer, një fëmijë i traumatizuar, një histori që nuk duhet të përsëritet kurrë më.

Në Ditën Ndërkombëtare për Eliminimin e Dhunës ndaj Grave, apeloj për VEPRIM” u shpreh Osmani.

Ky është postimi i plotë i saj:

Femicidi vazhdon të jetë një plagë e hapur. Jo thjesht një problem. Jo një statistikë. Por, një krizë kombëtare që po gërryen themelet e shoqërisë sonë, ditë pas dite.

Ajo që ndodhi në Gadime të Ulët nuk është thjesht “një rast tjetër”. Një grua, edhe pse e mbrojtur me urdhër aktiv, u sulmua barbarisht me sëpatë nga ish-bashkëshorti i saj. Kur një urdhër mbrojtjeje mbetet letër, atëherë rreziku bëhet realitet. Dhe realiteti na vret.

Numri i rasteve të dhunës ndaj grave dhe dhunës në familje po na e thotë troç: letrat nuk shpëtojnë jetë. Zbatimi, vendosmëria, reagimi pa vonesë – po!

Sepse pas çdo shifre fshihet një jetë e thyer, një fëmijë i traumatizuar, një histori që nuk duhet të përsëritet kurrë më.

Në Ditën Ndërkombëtare për Eliminimin e Dhunës ndaj Grave, apeloj për VEPRIM.

Me përgjegjësi. Me kujdes. Pa asnjë tolerim.

Ashtu siç e kërkon ligji. Ashtu siç e meriton çdo grua dhe vajzë në Republikën e Kosovës.

Çdo hap i gabuar, çdo neglizhencë, çdo vonesë mund të jetë fatale.

Askush që ushtron dhunë nuk duhet të ndihet i paprekshëm.

Asnjë grua nuk duhet të mbetet e pambrojtur.

Nuk ka kompromis kur bëhet fjalë për jetën dhe dinjitetin e grave.