KOSTT sqarohet për furnizimin me energji elektrike me 28 nëntor
Operatori i Sistemit, Transmetimit dhe Tregut të energjisë elektrike (KOSTT) ka mohuar deklarimet dhe raportimet se kompania EFT LLC do të furnizojë qytetarët e Republikës së Kosovës me energji elektrike më 28 nëntor 2025.
Në një sqarim zyrtar, KOSTT thotë se bazuar në të dhënat e Operatorit të Tregut, EFT LLC nuk ka rezervuar kapacitete ndërkufitare për furnizimin e konsumit të brendshëm në Kosovë, por vetëm për transit të energjisë elektrike, shkruan IndeksOnline.
Sipas KOSTT-it, kapacitetet ndërkufitare të rezervuara në platformën SEE CAO përdoren nga palët tregtare për import dhe eksport të energjisë, ndërsa të hyrat nga përdorimi i këtyre kapaciteteve ndahen mes operatorëve të sistemeve të transmetimit në rajon.
Njoftimi i plotë:
Operatori i Sistemit, Transmetimit dhe Tregut të energjisë elektrike (KOSTT) demanton deklarimet dhe raportimet se EFT LLC do të furnizojë qytetarët e Republikës se Kosovës me energji elektrike me datë 28 nëntor 2025.
Bazuar në të dhënat zyrtare të Operatorit të Tregut, KOSTT siguron qytetarët dhe opinionin publik se EFT LLC nuk ka rezervuar në SEE CAO kapacitete ndërkufitare për furnizimin e konsumit të brendshëm në Kosovë, por me qëllim transiti të energjisë elektrike. Palët tregtare rezervojnë kapacitetet ndërkufitare në SEE CAO për import dhe eksport ndërkufitar të energjisë elektrike.
Të hyrat nga shfrytëzimi i këtyre kapaciteteve ndahet ndërmjet OST-ve përkatëse sipas metodologjisë së SEE CAO. Theksojmë që KOSTT është themeluese dhe aksionar në SEE CAO së bashku me shtatë (7) OST-të e rajonit të Evropës Juglindore (Kroaci, Bosnjë dhe Hercegovinë, Mali i Zi, Shqipëri, Greqi, Turqi dhe Maqedoni e Veriut).
SEE CAO është përgjegjëse për alokimin e kapaciteteve ndërkufitare të transmetimit të energjisë elektrike në dhjetë kufij të zonave të ofertimit në Evropën Juglindore. Alokimi kryhet përmes ankandeve eksplicite të bazuara në Net Transfer Capacity (NTC) në përputhje me kërkesat e Rregullores (KE) 714/2009 të Parlamentit Evropian dhe Këshillit mbi kushtet për hyrje në rrjet për shkëmbimin ndërkufitar të energjisë elektrike dhe Traktatit të Komunitetit të Energjisë.
KOSTT mbetet i përkushtuar për forcimin e besimit publik përmes komunikimit të përgjegjshëm dhe informimit korrekt.
