Industria e drurit kërkon procedura lehtësuese për eksport, rritja e kostove të lëndës së parë po ndikon në çmimet finale

Derisa vendi po përballet me rritje të çmimeve, megjithatë vlerësohet se çmimet nuk kanë lëvizur shumë në industrinë e drurit, por kjo mund të ndryshojë. Nga Shoqata e Përpunuesve të Drurit të Kosovës (ShPDK) i kanë bërë thirrje Qeverisë që të lehtësojnë procedurat doganore për eksporte/

Drejtoresha ekzekutive e SHPDK-së, Arieta Pozhegu, në një intervistë për Ekonomia Online ka thënë se çmimet e produkteve dytësore kanë pësuar rritje dhe kështu ka ndikuar edhe në çmimin final të produkteve.

Po këtu ajo thekson se industria e drurit mbetet një treg i lirë.

 “Sa i përket çmimeve, është treg i lirë dhe ato variojnë. Ndoshta ka pasur ngritje të vogla, por jo ndonjë ndryshim të madh. Ekzistojnë çmime të ndryshme për të njëjtin produkt, sepse ka produkte ekonomike, ka produkte me dizajn dhe materiale më të forta. Nuk jam e njoftuar konkretisht për ankesat, por nuk besoj se çmimet janë të larta. Çmimet bazohen në treg; nëse materialet gjatë dy-tri viteve kanë pasur luhatje prej 20–30% në rritje, normalisht që rritet edhe çmimi final. E gjithë lënda e parë, qoftë materialet dytësore, MDF-ja, mekanizmat—të gjitha kanë pësuar rritje, prandaj kjo reflekton në produktet finale. Megjithatë, ky është çmimi i tregut dhe besoj se është i pranueshëm. Për më tepër, ka edhe produkte ekonomike mjaftueshëm për ata që kërkojnë çmim më të ulët”, theksoi ajo.

Sa i përket ndihmës së qeverisë ndaj industrisë së drurit, Pozhegu tha se Ministria e Industrisë, Ndërmarrësisë dhe Tregtisë ka ofruar mbështetje përmes granteve.

“Është MINT, përmes Agjencisë KIESA, ku zakonisht ka komunikime dhe shpallje të vazhdueshme për ndërmarrjet e vogla, të mesme dhe mikro-ndërmarrjet, për përkrahje në makineri, digjitalizim dhe certifikim të produkteve. Ky ka qenë drejtimi kryesor ku kompanitë kanë pasur të drejtë aplikimi. Çdo vit janë ndarë rreth 6–10 milionë euro grante, por për të gjitha fushat, jo vetëm për industrinë e drurit. Ka edhe shtete si Luksemburgu apo donatorë të tjerë që plotësojnë fondin dhe pastaj bëhet shpërndarja përmes KIESA-s. Kjo është përkrahja qeveritare, pa përmendur pjesën e politikbërjes dhe strategjive të industrisë. Ne si shoqatë ofrojmë prej 20 vitesh njoftime për të rejat e fundit, organizimin e konferencave dhe ekspozimeve ndërkombëtare”, tha ajo.

Ajo pati edhe kërkesa ndaj Qeverisë për format e përkrahjes që mund t’i ofrojë industrisë së drurit.

“Nëse kjo industri konsiderohet strategjike nga qeveria, atëherë kërkesat tona për mbështetje janë të mëdha. Kosova ka mundësi të mobilizojë të gjithë donatorët dhe fondet. Kemi ide për zhvillimin e industrisë dhe duhet të rriten fondet për grante dhe investime në teknologji dhe lëndë të parë. Kur kompanitë marrin një projekt në Evropë, cikli i punës zgjatë rreth 6 muaj deri në shitjen e produktit, dhe ky cikël duhet mbuluar nga bankat komerciale. Shpesh për kompanitë është e vështirë për shkak të periudhës së kthimit të pagesës. Çdo fond zhvillimor për industrinë është i mirëseardhur dhe do të ishte një nxitje e madhe, jo vetëm për industrinë e drurit, por edhe për industritë e tjera në Kosovë. Nuk kemi shumë industri, por ato që i kemi duhet t’i stimulojmë që të ecin përpara”, shtoi Pozhegu.

Ndërkaq, kryetari i bordit të SHPDK-së, Zenel Kelmendi, për Eo tha se, pavarësisht rritjes së çmimeve në sektorë të ndryshëm, ai i drurit ka arritur të ecë përpara.

 “Përkundër të gjitha vështirësive në të gjithë sektorët, sektori i drurit ka arritur të ecë përpara. Ka rritje në prodhim, sidomos në atë që eksportohet—shifrat kanë qenë të larta. Besojmë se edhe vitin e ardhshëm do të ketë një rritje sado të vogël. Sa i përket ndihmës nga qeveria, mund të themi se jemi të kënaqur, sepse janë dhënë subvencione që vërtet e kanë ndihmuar sektorin tonë, janë blerë makineri të reja dhe kemi përfituar disa grante. Është në rrugën e duhur”, tha ai.

Kelmendi pati një thirrje për Qeverinë.

 “Kërkesat janë të mëdha, por njëra ndër kryesoret është lehtësimi i procedurave doganore për eksport, sidomos tash kur shumë kompani po eksportojnë jashtë. Inflacioni bën të vetën dhe për të mbijetuar duhet të rrisim edhe çmimet. Ngritjet kanë qenë normale dhe të domosdoshme, dhe mendoj se edhe vitin e ardhshëm do të ketë një rritje të vogël”, përfundoi ai.