Kërkohet plan për zgjedhjet, Malisheva zona më e rrezikuar nga ndërprerjet e rrymës

Në mbledhjen e sotme të Komisionit Qendror të Zgjedhjeve është kërkuar harmonizim me institucionet ditën e zgjedhjeve, në rast se mund të ketë ndërprerje të energjisë elektrike.

Anëtari i Partisë Demokratike të Kosovës (PDK), Arianit Elshani ka thënë se nevojitet planifikim i detajuar të dielën me 28 dhjetor, në rast se mund të paraqiten sfida të tilla.  

“Duke parë që gjatë kësaj periudhe të fushatës zgjedhore ka ndërprerje të energjisë anë e kënd vendit, konsideroj që prej KQZ-së nevojitet një komunikim i drejtë me ministrinë por edhe me institucionet dhe organet tjera, në këtë rast me KEDS-in edhe me KESCO-n dhe KOSST dhe kushdo që është i nevojshëm për të harmonizuar edhe për të parë se ku mund të kemi sfida për ditën e zgjedhjeve. Pra po flasim për procesin e numërimit që bëhet pas orës 19:00 por edhe që ka të bëjë edhe me funksionalitetin edhe të kamerave në çdo vendvotim por edhe me kapacitetet ekzistuese të qendrave të votimit, shkollave në këtë rast me gjeneratorët në qoftë se janë të pajisur, konsideroj që nevojitet një planifikim i detajuar i sekretariatit në raport me secilën qendër të votimit por edhe në anën tjetër të shpalosim edhe sfidat tona që mund t’i kemi me qendrat komunale të numërimit, sepse i gjithë procesi i numërimit tashmë është i varur prej teknologjisë, nuk janë gjëra që bëhen manualisht”, theksoi ai.

Drejtori i Zyrës për Regjistrim, Certifikim dhe Kontrollin Financiar të Subjekteve Politike, Besnik Buzhala tha se kjo çështje është diskutuar nga sekretariati por që do të diskutohet në mbledhjen e ardhshme.

Në mbledhjen e sotme është diskutuar edhe çështja e orarit për numërimin e votave, ku anëtari Muharrem Nitaj ka ngritur çështjen që të ketë pushim me datën 1 janar.

Ndërkaq, Alban Krasniqi nga Lëvizja Vetëvendosje tha se për shkak të integritetit të procesit nuk duhet të ndalet aktiviteti i punës.

Drejtori i Zyrës për Regjistrim, Certifikim dhe Kontrollin Financiar të Subjekteve Politike, Besnik Buzhala tha se komunat janë njoftuar për oraret e punës./Indeksonline/