Tri ministri të qeverisë “Kurti 3” drejtohen nga komunitetet, ndryshime edhe në përbërjen e kuvendit

Pjesë e qeverisë “Kurti 3”, nga gjithsej 19 ministri, janë edhe tri ministri që drejtohen nga përfaqësues të komuniteteve, transmeton IndeksOnline.

Tre ministrat e rinj, të cilët më parë ishin zgjedhur deputetë, kanë liruar vendet e tyre në Kuvendin e Kosovës, duke hapur rrugë për zëvendësime nga listat përkatëse zgjedhore.

Në vend të Rasim Demirit, i cili është emëruar ministër për Zhvillim Rajonal, deputet do të bëhet Brahim Shabani nga koalicioni Vakat.

Ndërkaq, në vend të Nenad Rashiqit, i emëruar ministër për Komunitete dhe Kthim, në kuvend do të hyjë Lazar Raduloviq nga subjekti “Za Slobodu, Pravdu i Opstanak”.

Po ashtu, në vend të Elbert Krasniqit, i cili është riemëruar në krye të Ministrisë së Administrimit të Pushtetit Lokal, deputet do të bëhet Fridon Lala nga Iniciativa e Re Demokratike e Kosovës.

Këto ndryshime janë rezultat i kalimit të deputetëve në detyra ekzekutive në kuadër të kabinetit të ri qeveritar./IndeksOnline/