Reshje të mëdha bore në Zvicër, autoritetet shpallin nivel alarmi 4 në disa rajone

Autoritetet meteorologjike paralajmërojnë për reshje intensive bore gjatë fundjavës, me deri në 90 centimetra borë në kantonin e Ticinos dhe rrezik për degë e pemë që mund të rrëzohen.

Edhe pse ditët e fundit kanë sjellë temperatura më të ngrohta dhe atmosferë pranverore, fundjava pritet të rikthejë dimrin në Zvicër. Autoritetet meteorologjike kanë paralajmëruar për reshje të mëdha bore që do të përfshijnë disa rajone të vendit.

Sipas njoftimit të MeteoSwiss, në kantonin e Ticino është shpallur niveli i rrezikut 4 nga 5, që konsiderohet paralajmërim i lartë për reshje të dendura bore. Në këtë rajon pritet që trashësia e borës së re të arrijë deri në 90 centimetra.

Megjithatë, reshjet nuk do të kufizohen vetëm në jug të vendit. Edhe disa kantone të tjera pritet të përballen me kushte të vështira atmosferike, ku është shpallur niveli i rrezikut 3 nga 5.

Kantonet që përfshihen në këtë paralajmërim janë:

Schwyz, Lucerne, Graubünden, Ticino, Valais, Bern, Glarus, Uri, Nidwalden, Obwalden, Zug

Sipas meteorologëve, në disa zona mund të bien deri në 80 centimetra borë të re, ndërsa paralajmërimi është në fuqi deri të dielën në mesditë. Përveç reshjeve intensive, autoritetet paralajmërojnë edhe për rreziqe shtesë, si degë dhe pemë që mund të thyhen apo rrëzohen nga pesha e borës, duke krijuar pengesa në rrugë dhe duke rritur rrezikun për qytetarët.

Autoritetet u bëjnë thirrje banorëve në rajonet e prekura të tregojnë kujdes gjatë lëvizjes dhe të ndjekin përditësimet e shërbimeve meteorologjike.