Jay-Z u bën “diss” Kanye West-it, Drake-s dhe Nicki Minaj-t gjatë performancës së tij në Filadelfia

Jay-Z ka tërhequr vëmendjen me një performancë surprizë në festivalin vjetor Roots Picnic në Filadelfia, ku gjatë një freestyle-i katërminutësh nuk kurseu kritikat ndaj disa prej emrave më të njohur të industrisë së muzikës, përfshirë Kanye West, Drake dhe Nicki Minaj.

Reperi 56-vjeçar duket se iu rikthye përplasjes me Kanye West-in, pas deklaratave të këtij të fundit në vitin 2025 lidhur me fëmijët e Jay-Z-së dhe Beyonce-s.

Në vargjet e tij, artisti mbrojti familjen dhe la të kuptohej se ende nuk e ka harruar episodin që shkaktoi tension mes tyre.

Gjatë performancës, Jay-Z hodhi gjithashtu akuza ndaj Nicki Minaj-t, duke përmendur jetën e saj personale dhe bashkëshortin Kenneth Petty.

Ai nuk kurseu as Drake-n, me të cilin shkëmbeu mesazhe të ashpra përmes vargjeve, duke iu përgjigjur deklaratave të fundit të reperit kanadez dhe duke komentuar edhe çështjet e tij ligjore me industrinë muzikore.

Pavarësisht kritikave ndaj Kanye West-it, Jay-Z performoi edhe disa nga hitet e albumit të tyre të përbashkët Watch The Throne, duke treguar se muzika mbetet e ndarë nga konfliktet personale.

Performanca e tij u bë menjëherë virale në rrjetet sociale, ndërsa fansat dhe mediat po komentojnë vargjet e forta që rikthyen në qendër të vëmendjes disa nga rivalitetet më të përfolura të hip-hopit.