Milani irritohet nga kërkesat e Allegrit, ky i fundit mund të mbetet edhe pa Napolin

Milani dhe trajneri Max Allegri ende nuk kanë arritur një marrëveshje për prishjen e kontratës, gjë që po krijon tension dhe po e vonon një lëvizje të mundshme të tij drejt Napoli.

Allegri u shkarkua nga Milani një ditë pas dështimit për t’u kualifikuar në Ligën e Kampionëve, së bashku me drejtues të tjerë të klubit si CEO Giorgio Furlani, drejtori sportiv Igli Tare dhe drejtori teknik Geoffrey Moncada.

Megjithatë, ai mbetet ende nën kontratë me Milanin deri në vitin 2027 dhe duhet të arrijë një marrëveshje me klubin për ta ndërprerë atë para se të marrë drejtimin e Napolit.

Sipas raportimeve, pengesa kryesore financiare është se Allegri kërkon rreth 2 milionë euro si kompensim personal për largimin e hershëm, plus edhe 3 milionë euro për stafin e tij.

Nga ana tjetër, pronari i “RedBird Capital Partners”, Gerry Cardinale, nuk është i gatshëm të paguajë një shumë të tillë për staf që tashmë është shkarkuar për mosarritje objektivash.

Ndërkohë, presidenti i Napoli, Aurelio De Laurentiis, thuhet se është gjithnjë e më i irrituar me vonesat dhe ka vendosur një afat prej 7 ditësh për zgjidhjen e situatës.

Nëse marrëveshja nuk mbyllet brenda këtij afati, Napoli mund të kthehet te alternativa të tjera për postin e trajnerit në “Stadio Diego Armando Maradona”.