Garda spanjolle jep detaje nga rrëmbimi i vajzës që u gjet në Kosovë
Një vajzë gjashtëvjeçare, e cila ishte rrëmbyer dy javë më parë nga babai i saj në Majorka të Spanjës, është gjetur në Kosovë, ndërsa babai i saj është arrestuar nga autoritetet kosovare, njoftoi Garda Civile spanjolle.
Sipas Gardës Civile, babai kishte planifikuar me kujdes arratisjen.
Ai e kishte fshehur fëmijën në bagazhin e automjetit për t’u larguar me traget nga ishulli i Majorkës dhe më pas kishte kaluar kufijtë pa deklaruar praninë e vajzës.
Hetimet nisën pas kallëzimit të nënës së fëmijës, e cila raportoi zhdukjen e vajzës dhe njoftoi autoritetet se ish-partneri i saj kishte dalë nga Spanja me fëmijën. Policia spanjolle konstatoi se arratisja ishte organizuar paraprakisht dhe se i dyshuari kishte ndërmarrë masa të shumta për të shmangur zbulimin.
Një nga elementet më të pazakonta të hetimit ishte zbulimi i një pajisjeje gjurmuese AirTag, të cilën vajza e kishte fshehur në çantën e saj. Megjithatë, hetuesit zbuluan se pajisja ishte futur në një zarf postar të destinuar për në Marok, në një përpjekje për të mashtruar autoritetet dhe për t’i orientuar hetimet në një drejtim të gabuar, shkruan media spanjolle Todo Alicante,
Garda Civile zhvilloi kontrolle në banesa të lidhura me rastin, analizoi pamjet e kamerave të sigurisë, transaksionet bankare dhe lëvizjet detare nga Majorka, ndërsa aktivizoi edhe mekanizmat ndërkombëtarë të bashkëpunimit policor. Autoritetet gjyqësore spanjolle lëshuan një urdhër arresti evropian dhe një urdhër ndërkombëtar ndaj të dyshuarit.
Gjatë hetimeve u zbulua se babai kishte mbyllur llogaritë bankare dhe kishte fshirë profilet në rrjetet sociale për të zvogëluar gjurmën e tij dixhitale. Po ashtu, policia gjermane identifikoi një automjet me të njëjtin regjistrim si ai i përdorur gjatë arratisjes, duke ngritur dyshime për përdorimin e targave të falsifikuara ose të dyfishta.
Sipas Gardës Civile, i dyshuari kishte ndryshuar edhe pamjen fizike gjatë qëndrimit në Kosovë për të shmangur identifikimin.
Operacioni u zhvillua në koordinim me autoritetet gjyqësore spanjolle, Njësinë Qendrore Operacionale të Gardës Civile, atasheun e Ambasadës së Spanjës në Berlin dhe autoritetet policore të disa vendeve, përfshirë Policinë e Kosovës.
Më 24 qershor, autoritetet kosovare arrestuan të dyshuarin gjatë një operacioni policor dhe lokalizuan vajzën, e cila u gjet në gjendje të mirë shëndetësore dhe iu dorëzua autoriteteve kompetente për mbrojtje. Të premten, fëmija u kthye së bashku me nënën e saj në shtëpinë e tyre në Majorka.
Rasti ishte bërë i ditur edhe nga Policia e Kosovës, e cila njoftoi se arrestimi u krye në bashkëpunim me autoritetet spanjolle dhe INTERPOL-in.
Edhe policia e Kosovës ka dhënë detaje për këtë rast.
Sipas policisë, drejtoria për Bashkëpunim Ndërkombëtar Policor e Policisë së Kosovës, kishte pranuar një informacion përmes INTERPOL-it nga autoritetet spanjolle, se një person i dyshuar me shtetësi gjermane A.M.L., d.t.l.1989, kishte rrëmbyer një fëmijë gjashte vjeçar dhe dyshohej se gjendet në Republikën e Kosovës se bashku me fëmijën e rrëmbyer.
Pas pranimit të këtij informacioni, Drejtoria për Bashkëpunim Ndërkombëtar Policor, ka marrë të gjitha masat duke i koordinuar aktivitetet me të gjitha njësitet tjera policore, me qellim te identifikimit dhe arrestimin e personit të dyshuar që kërkohej përmes INTERPOL-it me urdhër arrest-ndërkombëtar lëshuar nga autoritetet e Spanjës.
Operacioni rezultoi i suksesshëm, më 24.06.2026 i dyshuar se bashku me fëmijën e rrëmbyer, u lokalizua në një lokacion në Fushe Kosove ku edhe u arrestua.
Pas arrestimit me urdhër të prokurorit e kujdestar, i dyshuari u dërgua në mbajtje për 48 orë, kurse fëmija është trajtuar në bazë të procedurave ligjore dhe i është ofruar strehim i sigurt.
Zyrtaret nga Drejtoria për Bashkëpunim Ndërkombëtar Policor në koordinim me prokurorin e rastit dhe Qendrën për Pune Sociale dhe ne bashkëpunim me autoritetet spanjolle, pas verifikimit të të gjitha rrethanave të rastit, me datë 25.06.2026 ka bërë në mënyrë të sigurt kthimin e fëmijës tek nëna e saj.
