Harry dhe Meghan vizitojnë Mbretin Charles, për herë të parë pas 4 vitesh

Duka dhe Dukesha e Sussex, së bashku me fëmijët e tyre, Princin Archie dhe Princeshën Lilibet, kanë vizituar Mbretin Charles dhe Mbretëreshën Camilla.

Pallati i Buckinghamit konfirmoi të premten në mbrëmje se Mbreti dhe Mbretëresha e pritën familjen në Highgrove House më herët gjatë pasdites.

Pallati e përshkroi takimin në shtëpinë private të Mbretit në Gloucestershire si një “rast privat familjar”, shkruan BBC.

Është hera e parë që Mbreti i ka parë nipërit e tij, Archie-n, shtatë vjeç, dhe Lilibet-in, pesë vjeç, në më shumë se katër vjet.

Princi Harry dhe Meghan nuk kishin qenë në Mbretërinë e Bashkuar së bashku që nga viti 2022, kur morën pjesë në funeralin e Mbretëreshës Elizabeth II.

Princi Harry ka marrë pjesë në një numër ngjarjesh në Mbretërinë e Bashkuar këtë javë, por të enjten u konfirmua se Meghan dhe dy fëmijët nuk do ta shoqëronin atë në asnjë angazhim publik gjatë dy ditëve të fundit të vizitës së tij.

Nuk dihet se ku po qëndron familja gjatë kohës që është në Mbretëri të Bashkuar.

Takimi është një zhvillim i rëndësishëm në marrëdhëniet familjare që kanë qenë të tendosura që nga largimi i Princit Harry dhe Meghan nga Mbretëria e Bashkuar dhe detyra mbretërore në vitin 2020.