28-vjetori i Referendumit për Pavarësinë e Kosovës, Haradinaj: Edhe 6 tetori është referendum

Në 28-vjetorin e Referendumit për Pavarësi të Kosovës, të mbajtur më 26 shtator 1991, kryeministri në detyrë, Ramush Haradinaj, ka thënë se edhe në 6 tetor e kemi një referendum të ngjashëm.

Ai ka thënë se zgjedhjet e 6 tetorit janë referendum dhe se nuk do të lejohet prekja e kufijve dhe sovranitetit, me partinë e tij në Qeveri.

“Më 26 shtator 1991 populli i Kosovës masivisht i është përgjigjur referendumit, për t’u deklaruar për pavarësinë e vendit. Ky akt historik, vulosi vullnetin e popullit tonë për të jetuar të lirë e të pavarur. Tashti, 28 vjet më vonë, zgjedhjet që i kemi përpara janë referendum se nuk do të lejohet prekja e kufijve dhe e sovranitetit, për ta çuar në vend amanetin e brezave”, ka shkruar Haradinaj. Haradinaj, ndërkohë gjendet në SHBA. Atje ai ka takuar zyrtarë të lartë amerikanë.