Daçiqi i kundërpërgjigjet Zyberajt: Dua të shkoj në Hagë, si dëshmitar kundër UÇK-së

Ministri i Jashtëm i Serbisë, Ivica Daçiq ka thënë se këshilltari i Behgjet Pacollit, Jetlir Zyberaj gënjen në mënyrë të tmerrshme lidhur me disa dokumente socialiste për persekutimin e shqiptarëve.

Madje Daçiqi tha se është i gatshëm  të shkojë në Hagë, por si dëshmitar kundër shefave të Zyberajt nga autoritetet e larta të Prishtinës, siç thotë ai “drejtuan Ushtrinë e ashtuquajtur terroriste të Kosovës”.

“Pavarësisht gjithçkaje, unë jam i gatshëm të shkoj në Gjykatën Speciale në Hagë, kam tonelata materiale që më së miri tregojnë se kush e dëboi kë nga Kosova”, i ka thënë Daçiqi “Novostit” serb.

Kësisoj ai i është kundërpërgjigjur Zyberajt i cili në Facebook ka paraqitur një dokument të Partisë Socialiste të Serbisë (SPS) që mban datën : 17 shkurt 1999 ku siç shkruan ai”ndër shumë plane tjera kundër shqiptarëve të Kosovës, gjatë Konferencës në Rambuje, mund të lexojmë edhe tentimin për fshehje të masakrave dhe debimeve masive nga shtepitë të qytetarëve të Kosovës. Krejt kjo bëhej me qellimin e vetëm për ta mashtruar bashkësinë ndërkombëtar dhe NATO-në”.

“Në mesin e shumë emrave të njohur aty, që ishin kreaturë e aparatit të dhunës në kohën e Millosheviçit, mund të shihet edhe Ivica Daçiq. Jo rastësisht, carqe te caktuara në Serbi e quajnë Daçiqin edhe “malo Slobo”.

“Ky dokument duhet të shërbejë si bazë për ta thirrur Ivica Daçiqin në Gjykatën Speciale”.