Efekti Coronavirus: Shtyhet për afat të pacaktuar deklarimi i pasurisë nga zyrtarët shtetëror
Zyrtarët e ndryshëm publik, deri në fund të këtij muaji. më 31 mars është dashur të paraqesin në Agjencinë Kundër Korrupsion, deklarimin e pasurisë, mirëpo me situatën e fundit të krijuar pas përhapjes së coronavirusit edhe në Kosovë, kjo më nuk do të vlej, shkruan IndeksOnline.
Kështu është bërë e ditur përmes një njoftimi nga kjo agjenci.
Sipas tyre edhe deklarimet e pasurisë gjatë kësaj kohe do të mund të bëhen vetëm përmes postës elektronike.
Ndërkohë janë gjithsej 4694 zyrtarë që kanë për obligim ligjor deklarimin e rregullt vjetor të pasurisë në Agjencinë Kundër Korrupsionit, ndërsa deri para katër ditësh kërkesës për deklarimin e pasurisë i janë përgjigjur 676 zyrtarë të cilët kanë dorëzuar formularët e deklarimit të pasurisë në AKK.
Më poshtë e gjeni të plotë njoftimin e AKK-së:
Bazuar në vendimin e Qeverisë së Republikës së Kosovës Nr. 01/9, për ndërmarrjen e masave shtesë pas konfirmimit të rasteve pozitive me Corona Virus COVID-19, për reduktimin e veprimeve esenciale dhe staf esencial çdo institucion publik, përveç stafit të sektorit të shëndetësisë dhe të sektorit të sigurisë, Agjencia kundër Korrupsionit njofton opinionin publik se do të vazhdoj punën bazuar ne vendimet dhe udhëzimet e institucioneve publike.
Me këtë rast, Agjencia kundër Korrupsionit njofton të gjithë zyrtarët e lartë publik se për shkak të situatës së krijuar, nuk mund të pranojë deklarimin e pasurisë në mënyrë të drejtpërdrejtë nga zyrtarët e lartë apo personat e autorizuar në zyrat e AKK-së, ju lutemi të gjithë zyrtarëve të lartë publik që deklarimin e pasurisë ta bëjnë në mënyrë elektronike në adresën info@akk-ks.org, ndërsa formularët e deklarimit të pasurisë duhet të jene te nënshkruar dhe skanuar.
Agjencia kundër Korrupsionit njofton se afati i deklarimit të pasurisë shtyhet edhe për një periudhë të pacaktuar, ndërsa për të gjitha ndryshimet, AKK, do të njoftojë me kohë opinionin dhe institucionet publike./IndeksOnline/
